AFFA İcraiyyə Komitəsinin üzvü, Azərbaycan Futzal Federasiyasının prezidenti Zaur Axundov da Gəncədə "Kəpəz" – "Araz-Naxçıvan" oyununu izləyənlər arasında olub.

Prosport.Az-ın Gəncəyə ezam olunmuş əməkdaşının da iştirak etdiyi həmin müsahibəni videogörüntü ilə birgə təqdim edirik.

– “Araz-Naxçıvan” Çempionlar Liqasında çıxışını erkən başa vurdu. Komandanın uğursuzluğu barədə nə deyə bilərsiniz?
– Belə nəticə gözləməzdik. Arxayınçılıq, edilən səhvlər uğursuzluğa gətirib çıxardı. İnanıram ki, komanda bundan ciddi nəticə çıxaracaq. Gələcəkdə eyni səhvlər təkrarlanmayacaq.  

– Bu, Vitali Borisovun baş məşqçi kimi ilk sınağı idi. Demək olar ki, o, ilk sınaqdan uğursuz çıxdı?
– Təbii ki, Borisovun debütu uğursuz oldu. Amma bu, idmandır. Qarşıda dünya çempionatının seçmə mərhələsi gəlir. Komanda şəklində bu oyunlara ciddi hazırlaşmalıdırlar. Vitali Borisovla 1 illik müqaviləmiz var. Müqaviləyə əsasən may ayının sonuna qədər işimizi davam etdirəcəyik.

– Futbol millimizdən Belçika ilə oyunda nə gözləmək olar?
– Futbolda olmayan şey yoxdur. İstər Belçika yox, Braziliya olsun, istərdim ki, futbolçular meydanda döyüşsün. Futbolda qalib gəlmək də olar, uduzmaq da. Əsas odur ki, futbolçular xarakter göstərib meydanda döyüşsünlər. Ötən dəfə müsahibəmdə də demişdim ki, bizə döyüşkən, meydanda can qoyan futbolçular lazımdır. Rəqibdən çəkinməsinlər, məşqçi dediyini etsinlər. Dövlətimizin qələbəsi qarşısında, təbii ki, futbolda da öz sözümüzü deməliyik. İnandırım sizi, döyüşsələr, hər bir nəticə mümkündür.

– Gəncə şəhər stadionunun bu vəziyyəti sizə necə təsir edir?
– Təbii ki, adamın ürəyi ağrıyır. Gəncə Azərbaycanda futbol ənənəsi olan bir şəhərdir. Burada futbolu sevirlər. Siz özünüz də görürsünüz ki, o biri şəhərlərə baxanda burad azarkeş çoxdur. Ümidvaram ki, yaxın bir zamanda bu gözəl stadion təmir olunub azarkeşlərin istifadəsinə veriləcək.

– "Araz-Naxçıvan"ın “Kəpəz” üzərində qələbəsini necə şərh edərdiniz?
– Komanda qələbə qazandı. Bir naxçıvanlı və İcraiyyə Komitəsinin üzvü kimi gəlib bazar günü oyuna baxdım. Təbii ki, komandada çatışmazlıqlar çoxdur. Bu da ondan irəli gəlir ki, komanda çempionata başlamağa 17 gün qalmış yığılıb. Ümid edirəm ki, məşqçilər korpusu fasilədən istifadə edib komandanı növbəti oyunlara yaxşı hazırlayacaq.

– Gəncədə komanda var, stadion, şərait yoxdur. Ancaq Lənkəranda stadion olsa da, komanda yoxdur. Niyə Lənkəran futbolsuz qalıb?
– Lənkəran futbolsuz qalmayıb. Region Liqada çıxış edən komandaları var. Sadəcə, orada normal sponsor lazımdır ki, komanda qurub, sıfırdan mübarizəyə başlasın. "Araz-Naxçıvan" 8 il idi ki, Premyer Liqada oynamırdı. Blokada şəraitində olsa da, aşağı liqada çıxış etdi. Orada bəzən qışda təyyarə də uçmur. Lənkəran isə budur buradır. Avtobanla 2 saata Lənkərana çatmaq olur.

– Sizcə, millidə Canni De Byazi ilə əməkdaşlığa davam etmək lazımdır?
– Bunu indi demək çətindir. Qarşıda hələ oyunlarımız var. Yenə də deyirəm ki, De Byazi tanınmış məşqçidir. Amma biz ondan bizi dünya çempionatına aparmağı gözləməməliyik. Amma onu da deyim ki, o burada qonaqdır.

– Sizcə, yerli məşqçilərlə də bu nəticəni əldə etmək olmazdı?
– Yerli məşqçilər də milliyə rəhbərlik edib də. Hamı kimi mən də yerli məşqçinin olmasını istəyirəm. Ancaq futbolçu materialı söhbəti var... De Byazi Azərbaycanı bizim qədər istəyə bilməz.

– "Araz-Naxçıvan"ın Naxçıvana qayıtması yaxın günlərdə mümkündür?
– Dövlət stadionun təmiri üçün maliyyə vəsaiti ayırıb, yaxın günlərdə təmir işləri başlayacaq. Meydançanın örtüyü dəyişdiriləcək. VAR sistemi qurulub. İşıqlandırma sistemi dəyişdiriləcək. Mən də istəyirəm ki, komanda Naxçıvanda oynasın. I Liqada oynayanda komandanı dəstəkləməyə 7-8 min azarkeş gəlirdi. Ümidvaram ki, ilin sonuna Naxçıvana qayıdış olacaq.

– Naxçıvana nəqliyyat məsələsi necə həll olunacaq?
– Hələ ki təyyarə ilə gediləcək. Amma ümid edirəm ki, Zəngəzur dəhlizi tezliklə açılacaq və biz də qatar yolu ilə Naxçıvana rahat gedəcəyik.

– Əvvəlki turlardan fərqli olaraq, Gəncədə “Araz-Naxçıvan” dəstəksiz qalmışdı. Bu nə ilə bağlı idi?
– Bunun səbəbini deyə bilmərəm, klubun funksionerlərindən soruşmaq lazımdır. Naxçıvanlı azarkeşlər Gəncədə olsaydı, daha da maraqlı olardı. Ancaq sizə deyim ki, bugünkü oyunda atmosfer əla idi. "Keşlə" və "Şamaxı"nın rəhbəri olarkən də Gəncə azarkeşlərindən həmişə razı olmuşam. Mehman müəllimə ("Kəpəz"in idman direktoru Mehman Allahverdiyevi nəzərdə tutur – red.) də dedim ki, azarkeşlərə halal olsun ki, komandanı belə dəstəkləyirlər.

– Futzal klublarına maliyyə ayrılması məsələsi açıq qalıb. O yöndə nə yenilik var?
– Düz deyirsiniz, məsələ açıq qalıb. İnşallah, yəqin ki növbəti AFFA İcraiyyə Komitəsinin iclasında mən bu məsələni yenidən qaldıracağam. Böyük futbolda olduğu kimi, futzalda da ənənə olmalıdır. Hər şey vəsaitə bağlıdır. Ümid edirəm ki, bu məsələ də həllini tapacaq.