Azərbaycan Basketbol Liqasının II turunda NTD-ni 102:68 hesabı ilə darmadağın edən "LANDAU Lions" klubunun baş məşqçisi Erhan Toker matçdan sonra jurnalistlərin suallarını cavablandırıb.

Prosport.Az xəbər verir ki, təcrübəli mütəxəssis qarşılaşmaya məşq xarakterli yanaşdıqlarını və əsas heyət üzvlərinə istirahət verdiklərini bildirib:

"Bu oyuna biz məşq xarakterli yanaşırdıq. Əvvəlcədən də bəlli olduğu kimi, NTD gənc basketbolçulardan ibarət kollektivdir. Ceyms Freyzer və Edvart Polayta istirahət vermək istədik və onlar da dincəldilər".

Toker komandasının müdafiə xəttindəki nöqsanlara da toxunub:

"Müdafiə ilə bağlı problemlərimiz var. Bu gün gənc komandaya qarşı oynasaq da, bizim də müəyyən qayğılarımız var idi və bunların üzərində işləməliydik. Əslində, daha çox dəqiqə fərdi mübarizəyə əsaslanan basketbol oynamaq istədik. Lakin cərimələrin sayı artdıqca mövqe müdafiəsinə də keçid etdik. Rəqib də çox yaxşı mübarizə apardı. Məncə, pis oyun olmadı".

Açılış oyunundan sonra FIBA Avropa Kubokunda "Priviedza" ilə keçiriləcək səfər matçına da toxunan çalışdırıcı rəqib seçiminin düşərgədəki mövcud vəziyyətə uyğun olduğunu qeyd edib:

"Əslində, hamı sağlam olsaydı, təbii ki, daha güclü komandaya qarşı oynamaq daha səmərəli olardı. İndiki vəziyyətdə isə bu səviyyədə rəqiblə qarşılaşmaq bizim üçün daha yaxşı oldu".