NTD basketbol klubunun baş məşqçisi Tahir Baxşıyev "LANDAU Layns"la keçirilən qarşılaşmadan sonra komandasının çıxışını qiymətləndirib.

Prosport.Az xəbər verir ki, mütəxəssis komandanın nümayiş etdirdiyi oyundan narazı qaldığını açıq şəkildə bildirib:

"Biz çox pis oynadıq. Məsələ böyük hesabla uduzmağımızda deyil, oyunumuzun özü çox zəif idi. Mən heç vaxt oyunçulardan kimisə ayrıca qeyd etməyi sevmirəm. Amma bu gün Məhəmməd Hüseynli çox zəif oynadı. Əvvəlki matçda əla çıxış etmiş, 30 xal toplamışdı. Bu gün isə oyunu alınmadı".

Baş məşqçi qarşıda onları böyük iş həcminin gözlədiyini və bu cür qarşılaşmaların gənc basketbolçular üçün dərs olmalı olduğunu vurğulayıb:

"Bu mövsüm bizi çox işin gözlədiyini bilirdik. Oyunçular da bunu başa düşməlidirlər. Hər oyun onlar üçün böyük təcrübə və dəyərli dərsdir. İnkişaf etmək üçün hələ çox çalışmalıyıq. Oyunçuların da bunu anlayacağına əminəm".

Qeyd edək ki, görüş "LANDAU Layns"ın 102:68 hesablı qələbəsi ilə başa çatıb.