Azərbaycan qadın voleybol millisində daha bir ayrılıq yaşanıb.

Prosport.Az xəbər verir ki, millinin liberosu Yuliya Kərimova yığmadan ayrıldığını açıqlayıb.

Təcrübəli voleybolçu sosial şəbəkə hesabında paylaşdığı vida mesajında milli komandada keçirdiyi illərin onun həyatının böyük hissəsinə çevrildiyini bildirib.

“Bu sözləri bu gün demək mənim üçün çox çətindir. Amma onları səmimi şəkildə söyləmək istəyirəm. Mən milli komandadan ayrılıram.

Bu müddət ərzində burada çox şey yaşadım: qələbələr və məğlubiyyətlər, sevinc və məyusluqlar, ağır məşqlər, yarışlar, hər şeyi atıb getmək istədiyim anlar və bütün bu zəhmətin həqiqətən dəyərli olduğunu hiss etdiyim məqamlar.

Milli komanda həyatımın böyük bir hissəsinə çevrildi. Burada təkcə idmançı kimi deyil, insan kimi də böyüdüm. Çox şey öyrəndim, çox şey yaşadım”, – deyə Kərimova qeyd edib.

O, milli komandadan ayrılsa da, idmandan və məqsədlərindən imtina etməyəcəyini vurğulayıb:

“Bundan sonra yolumun məni hara aparacağını bilmirəm. Amma bir şeyi dəqiq bilirəm: milli komandadan ayrılıram, idmandan yox. Məqsədlərimdən isə heç vaxt imtina etmirəm”.

Qeyd edək ki, Yuliya Kərimova Azərbaycan millisinin 2026-cı il Avropa çempionatındakı heyətində yer alan liberolardan biri olub. Yığmanın turnir üçün yekun heyətində Kərimova ilə yanaşı Bəyaz Quliyeva və Ceyran İmanova da libero mövqeyində göstərilmişdi.

Kərimova 2025-ci ildən “Turan” klubunun formasını geyinir.

Daha əvvəl Polina Rəhimova da Azərbaycan millisi ilə vidalaşıb.