"İmişli" rəhbərliyi müvəqqəti baş məşqçi Ervin Perkonsa möhlət verib.

Prosport.Az sportinfo.az-a istinadən xəbər verir ki, latviyalı mütəxəssis Premyer Liqanın növbəti 2 turunda da komandanın sükanı arxasında dayanacaq.

Əyalət təmsilçisi onun başçılığı ilə Premyer Liqanın VIII turunda "Turan Tovuz"u Yevlaxda qəbul edib və 1:0 hesabıyla qalib gəlib.

Üzümüzə gələn 2 matçda da uğurlu nəticə qazansa, onunla nəinki qış fasiləsinə qədər, hətta ondan sonra da yola davam edəcəklər. Yenə də hər şey özündən asılıdır.

Ümumiyyətlə, "İmişli" yaxın illərdə yerli baş məşqçi ilə işbirliyi qurmayacaq. Bu barədə prezident Kamran Eyyubov klubdaxili toplantıda məlumat verib.

O, bu məsələyə həsr olunan yığıncaqda komandanın gələcək perspektivi barədə planlarını bölüşüb. Aran təmsilçisinin başqanı bildirib ki, hazırda kollektivi etibar edəcəyi azərbaycanlı mütəxəssis tanımır.

Eyyubov vəziyyətdən çıxış yolunu xarici çalışdırıcı tapmaqda görür. Deyib ki, hazırda bir neçə əcnəbinin namizədliyini gözdən keçirir və yaxın vaxtlarda yekun qərar verəcək.

"İmişli" bir neçə gün öncə baş məşqçisi Fərid Namazovla yolları ayırıb. Komandaya müvəqqəti olaraq latviyalı Ervins Perkons rəhbərlik edir.

Kollektiv Premyer Liqada 7 xalla 9-cu sırada yer alıb. Namazovun gedişinə səbəb də elə bu uğursuz nəticədir. 7 tura cəmi 4 xal topladığı üçün gənc sükançı istefaya göndərilib.

İmişli rayonunun eyniadlı təmsilçisi elitada 2-ci mövsümünü keçirir. Debüt ilində kollektivi Jorj Kaşkilya çalışdırıb.

Mövsümü 9-cu yerdə başa vuran portuqaliyalı rəhbərliklə müəyyən məsələlərdə fikir ayrılığı yaşadığı üçün müqavilənin müddətini uzatmayıb.