Azərbaycan qadın voleybol millisinin baş məşqçisi Faiq Qarayev Avropa çempionatında Niderlanda qarşı keçirilən oyun barədə fikirlərini bölüşüb.

Prosport.Az xəbər verir ki, mütəxəssis komandanın matça yaxşı hazırlaşdığını və qələbə üçün şanslarının olduğunu deyib.

“Düşünürəm ki, Niderlanda qalib gələ bilərdik. Qızlar oyuna yaxşı hazırlaşmışdılar. Nəticədən asılı olmayaraq, onlara təşəkkür edirəm. Əsas məqsədimiz qrupdan çıxmaq idi və buna nail olduq”.

Baş məşqçi bəzi voleybolçuların yüksək səviyyəli yarışlarda kifayət qədər təcrübəsinin olmamasının da özünü göstərdiyini vurğulayıb.

Onun sözlərinə görə, Azərbaycan millisi ilk setdə yaxşı oyun nümayiş etdirib, lakin sonrakı hissələrdə buraxılan texniki səhvlər üstünlüyü qorumağa imkan verməyib.

“Çox istəyirdim ki, qələbə qazanaq. Həm Belçika, həm də Niderlandla oyunlarda qalib gəlmək imkanımız var idi. Təəssüf ki, heyətdəki bir çox oyunçunun belə yüksək səviyyəli yarışlarda təcrübəsi yoxdur. İlk setdə çox yaxşı oynadıq. Digər setlərdə də eyni oyunu davam etdirə bilərdik. Lakin texniki səhvlər qələbə qazanmağımıza mane oldu”, – deyə Faiq Qarayev əlavə edib.

Mütəxəssis son günlər millinin kapitanı Ayşən Abduləzimova ilə jurnalistlər arasında baş verən xoşagəlməz hadisəyə də toxunub: "İnanmraram ki, komandanın kapitanı belə etsin. Ayşən çox tərbiyəli, vətənini sevən qızdır. Əgər jurnalistlərə "kənara çəkilin, mən sizə müsahibə vermirəm" deyibsə, təqsiri var. Oyundan sonra həyəcan ola bilər. Jurnalistlər bizi dostumuzdur, oyunlarımızı şərh edən, göstərəndir. Tənqid də edə bilərlər. Uduzmuşam, məni nə qədər istəyirsiz, tənqid edin. Mən heç vaxt tənqiddən qorxan adam deyiləm. İstərdim ki, bu söhbət bağlansın. Ayşənə komandanın baş məşqçisi kimi nə lazımdırsa, demişəm. 

Qeyd edək ki, Azərbaycan millisi Niderlanda 1:3 hesabı ilə məğlub olsa da, 8 xalla C qrupunda üçüncü yeri tutaraq Avropa çempionatının 1/8 final mərhələsinə yüksəlib.