Dünən "Turan Tovuz" futbol klubu 2 milyon dollarlıq sponsorluq müqaviləsi bağladı.

Prosport.Az-ın xəbərinə görə, klubun İdarə Heyətinin sədri Ehtiram Quliyev futbolumuzun tarixində ilk dəfə olaraq məxfiliyi pozub 1 il ərzində əməkdaşlıqdan əldə edəcəkləri maliyyə məbləğini açıqladı.

2 milyon dollar. Kifayət qədər yaxşı məbləğdir. "PeakEye" şirkətinin rəhbəri kimi bildiyimiz Ali Öztürk danışmasa da (hər halda onunla müqavilə bağlanıldı), E.Quliyevin sözlərindən belə anlaşıldı ki, tərəfdaş Türkiyəni təmsil edir.

Bəs "PeakEye" şirkəti hansı sahədə fəaliyyət göstərən Türkiyə şirkətidir? Əvvəla, onu bildirək ki, "Gözün zirvəsi" mənasını verən bu şirkətin rəhbəri Ali Öztürk deyil. İnternet mənbələrində şirkətin İdarə Heyətinin sədrinin Tacəttin Çoban və onun həmtəsisçilərindən birinin Kürşat Oğuzhan Akıncı olduğu bildirilir.

İstənilən halda, bizə şirkətin rəhbərinin kim olması o qədər də önəm kəsb etmir. Azərbaycan futboluna pul yatırılması bizi əsas xoşnut edən məqamdır. İmzalanma mərasiminin "Qarabağ" klubunun sahibi və baş sponsoru "Azersun"a məxsus "Dreamland" Qolf Kompleksində reallaşması sözügedən şirkətin də bu məsələdə "Turan Tovuz"a yardım etdiyi qənaətinə gəlməyə bizə əsas verir. Hər halda, Ehtiram Quliyevin futbola gəlməzdən əvvəl "Qarabağ" rəhbərliyi və baş məşqçisi Qurban Qurbanovla yaxşı münasibətlərinin olması heç kimə sirr deyil. "Azersun" və "Hüner Group"un rəhbərləri Bakıda fəaliyyət göstərməzdən əvvəl, Türkiyə mühitində biznes fəaliyyəti ilə məşğul olub.  

Deyəsən, yuxarıdakı sualın cavabını unutduq. "PeakEye" hərbi sahədə fəaliyyət göstərir. Hərbi sahədə texnologiyalar – dron, ratsiya, mina detonatorları və s. məhz bu şirkət tərəfindən istehsal edilir. Şirkət kibertəhlükəsizlik sahəsində də aktiv fəaliyyətlə məşğuldur.

İnternet mənbələrində bu şirkətin hansısa Türkiyə idmanına dəstək olduğuna dair məlumata da rast gəlinmir. Böyük ehtimalla, hərb sahəsində olduqlarından bir qədər hərbçi məxfilikləri də mövcuddur (bəlkə də Ali Öztürkün hərbçi xarakterinə məxsus danışmağa üstünlük verməməsi də buradan irəli gəlirdi). Çünki bu tərəfdaşlıq belə, şirkətin sosial şəbəkə hesablarında əksini tapmayıb. Bu səbəbdən "PeakEye" şirkətinin dəstəklədiyi ilk idman/futbol klubunun "Turan Tovuz" olub-olmaması haqqında dəqiq məlumat vermək çətindir.

Səbuhi Musa