Bakıda keçirilən U-17 dünya çempionatında 71 kq çəki dərəcəsində qızıl medal qazanan erməni güləşçi Janes Nazaryan yarışın təşkilindən razı qaldığını bildirib.

Prosport.Az xəbər verir ki, o, jurnalistlərə açıqlamasında Azərbaycana və təşkilatçılara təşəkkür edib.

“Dünya çempionatını belə yüksək səviyyədə təşkil etdiklərinə görə Azərbaycana təşəkkür edirəm. Əhvali-ruhiyyəmiz yüksək idi. Yarış çox yüksək səviyyədə keçdi, güclü iştirakçılar var idi. Düşünürəm ki, bu yarış bizi daha da motivasiya edəcək. Buna görə təşkilatçılara və əməyi keçən hər kəsə təşəkkür edirəm”, – deyə Nazaryan bildirib.

O, rəqiblərinin də güclü olduğunu vurğulayıb.

“Deməzdim ki, zəif idilər, əksinə, çox yaxşı hazırlaşmışdılar. Ancaq mən daha yaxşı mübarizə apardım və yaxşı nəticə əldə etdim”, – deyə o qeyd edib.

Nazaryan Bakıda yüksək səviyyədə qarşılandıqlarını da bildirib:

“Hər şey qaydasında idi. Bizi çox yaxşı qarşıladılar”.