Ermənistanın yunan-Roma güləşi üzrə U-17 yığma komandasının baş məşqçisi Qaqik Xaçatryan Bakıda keçirilən dünya çempionatında jurnalistlərin suallarını cavablandırıb.

Prosport.Az həmin müsahibəni təqdim edir: 

– 2-ci yarış günündən sonra idmançılarınızın çıxışını necə qiymətləndirirsiniz?

– Biz ilk dəfədir ki, Bakıda yeniyetmələr arasında dünya çempionatında iştirak edirik. Pis çıxış etmədik. Bu gün bir finalçımız və bir bürünc medalçımız oldu. Bundan əlavə, 1 idmançımız 5-ci yeri tutdu. Sabah isə daha 2 idmançımız təsəlliverici görüşlərdə mübarizə aparacaq.

– Bakının dünya çempionatını təşkil etmə səviyyəsi barədə fikriniz necədir?

– Fikrim çox müsbətdir. Təşkilatçılıq çox yüksək səviyyədədir. Mən 50 ildir məşqçi kimi fəaliyyət göstərirəm və bizi hər zaman belə qarşılamayıblar. Burada hər şey dəqiq təşkil olunub – əlaqələndirmə, yarışın təşkili, ümumi iş prosesi. Sadəcə, yüksək səviyyədir.

– Bakıya gəlməzdən əvvəl bunu gözləyirdinizmi?

– Mən 20 yaşım olanda da Bakıda olmuşam. O vaxt burada güləşmişdim. Amma o zaman başqa dövr idi. İndi isə Bakı çox inkişaf edib – gözəl yollar, böyük bağlar, parklar salınıb. Bakı çox xoşuma gəldi. Milli Gimnastika Arenası da çox gözəldir.

– İdmançılarınız qalib gələndə və ya məğlub olanda tamaşaçıların münasibətini hiss etdinizmi? Tribunaların reaksiyası necə idi?

– Bəli. Açığı, bunu gözləmirdim. Tamaşaçılar çox mehriban münasibət göstərir, heç kim mənfi davranmır. Onlar ədalətli mübarizəni, təmiz idmanı dəstəkləyirlər. Hakimlik də ən yüksək səviyyədədir. Məncə, ən vacib məqam da məhz budur. Bəli, hakimlik həqiqətən çox yüksək səviyyədədir.