Mərakeşin Kasablanka şəhərində keçirilən III Dünya Korporativ Oyunlarında Azərbaycan dövlət qurumlarının əməkdaşları uğurlu nəticələr əldə edib.

Prosport.Az xəbər verir ki, Azərbaycan çempionu SOCAR-ın minifutbol komandası isə 54 komandanın mübarizə apardığı yarışın final görüşündə yerli komanda, Mərakeşin ən böyük media qurumlarından birini təmsil edən "Le Matin"ə 1:0 hesabı ilə qalib gələrək III Dünya Korporativ Oyunlarının qalibi olub.

Bu tarixi uğur sayəsində SOCAR bu idman növü üzrə Dünya Korporativ Oyunlarının qalibi adını qazanan ilk Azərbaycan komandası olmaqla yanaşı, turniri məğlubiyyətsiz başa vuraraq kuboka sahib çıxan ilk Azərbaycan komandası kimi də tarixə düşüb.

Qeyd edək ki, SOCAR komandası finala gedən uğurlu yolda keçirdiyi bütün qarşılaşmaları qələbə ilə başa vurub. SOCAR 54 komandanın mübarizə apardığı turnirdə "EM Enerji"ni 4:0, "Kredit Aqrikol"u 6:3, CMS-i 5:2, "Rostek"i 4:1, "Stelantis Kenitra"nı 1:0, yarımfinalda isə "Nyurest"i 3:1 hesabı ilə məğlub edib.

Bundan başqa, kişilər arasında voleybol və basketbol yarışlarında Fövqəladə Hallar Nazirliyinin (FHN) komandaları bütün rəqiblərini geridə qoyaraq qızıl medal qazanıb. FHN-in əməkdaşı Əli Bayramov isə stolüstü tennis yarışlarının bürünc medalını əldə edib. Şahmat yarışlarında Azərbaycan Dəmir Yollarının əməkdaşı Sənan Quluyev də qızıl medal qazanıb.