"Qarabağ"ın 14 yaşadək futbolçulardan ibarət komandası İtaliyada keçiriləcək beynəlxalq turnirdə qüvvəsini sınayacaq.

Prosport.Az xəbər verir ki, bu barədə klubun mətbuat xidməti məlumat yayıb. 

Komanda 5-8 iyun tarixlərində Palmanova şəhərində təşkil olunacaq "Fabio Zuccheri Cup" turnirində iştirak edəcək.

12 komandanın mübarizə aparacağı yarışda "Qarabağ" B qrupunda yer alıb. Ağdam təmsilçisi qrup mərhələsində İtaliyanın "Bolonya" və "Karlin Muzzane", həmçinin Xorvatiyanın "Hayduk Split" komandaları ilə qarşılaşacaq.

Turnirdə həmçinin İtaliyanın "Atalanta", "Venesiya" və "Udineze", Bosniya və Herseqovinanın "Zrinski", Sloveniyanın "Primorye", eləcə də Xorvatiyanın "Lokomotiva" (Zaqreb) klubları mübarizə aparacaqlar.

Reqlamentə əsasən, qrup qalibləri və ən yaxşı göstəriciyə malik ikinci yerin sahibi yarımfinala yüksələcək. Digər komandalar isə 5-12-ci yerlər uğrunda yarışacaqlar.

Qrup mərhələsinin görüşləri Armando Zimolo Trivinyano Stadium stadionunda keçiriləcək. Oyunlar 20 dəqiqəlik iki hissədən ibarət olacaq.

"Qarabağ" ilk matçını iyunun 6-da "Karlin Muzzane"yə qarşı keçirəcək. Komanda daha sonra "Bolonya" və "Hayduk Split"lə üz-üzə gələcək. Turnirin final mərhələsinin oyunları və bağlanış mərasimi iyunun 7-də baş tutacaq.