Məşhur azərbaycanlı biznesmen Mübariz Mənsimov "Xəzər Lənkəran" futbol klubunun fəaliyyətinin bərpası istiqamətində addımlar atır.

Prosport.Az "sportifo.az"ya istinadən xəbər verir ki, Türkiyədə yaşayan iş adamı klubun yenidən futbol səhnəsinə qayıdışı prosesinin sürətləndirilməsi ilə bağlı müvafiq tapşırıqlar verib.

Bildirilir ki, Mənsimova məxsus holdinqin nümayəndələri yaxın vaxtlarda Azərbaycana səfər edəcəklər. Səfər çərçivəsində Xəzər Lənkəran Mərkəzi Stadionunun mövcud vəziyyəti ilə bağlı hesabat hazırlanacaq. Bundan sonra arenada aparılması nəzərdə tutulan yenidənqurma və təmir işlərinin həcmi müəyyənləşdiriləcək, layihənin smetası tərtib olunacaq.

Məlumata görə, Mübariz Mənsimov stadionun əsaslı təmiri ilə bağlı ilk göstərişi iki il əvvəl verib. Lakin həmin dövrdə arenanın sənədləri ilə bağlı problemlər olduğundan işlərə başlanılmayıb.

Xəbərdə qeyd olunur ki, uzun illər "Xəzər Lənkəran"ın prezidenti olmuş Mais Mənsimov stadionun sənədlərini öz adına keçirdiyi üçün tərəflər arasında hüquqi mübahisə yaranıb. Mübariz Mənsimov məsələ ilə bağlı məhkəməyə müraciət edib.

Bir neçə ay davam edən məhkəmə çəkişməsinin yekununda qərarın Mübariz Mənsimovun xeyrinə çıxdığı bildirilir. Bununla da stadionla bağlı hüquqi maneələrin aradan qalxdığı və klubun bərpası istiqamətində işlərin yenidən gündəmə gəldiyi vurğulanır.