Azərbaycan Voleybol Federasiyası (AVF) Şahin Çatmanın yeniyetmə və gənc qızlardan ibarət milli komandaların baş məşqçisi vəzifəsindən ayrıldığını təsdiqləyib.

Prosport.Az xəbər verir ki, türkiyəli mütəxəssislə müqavilənin başa çatdığı bildirilib.

U-18 ölkə birinciliyinin mükafatlandırılma mərasimində AVF prezidenti Şahin Bağırov Azərbaycan voleyboluna verdiyi töhfələrə görə Çatmaya təşəkkürnamə təqdim edib. Həmçinin gənclərdən ibarət milli komandamızın üzvləri məşqçiyə yığmanın simvolik formasını hədiyyə veriblər. Türkiyəli mütəxəssis çıxış edərək AVF rəhbərliyinə ona bu illərdə yaradılan şəraitə görə təşəkkürünü bildirib. O, yeniyetmə və gənc voleybolçuların tezliklə əsas yığma komandalarda çıxış edəcəklərinə əminliyini ifadə edib, hər birinə uğurlar arzulayıb.

Qeyd edək ki, Şahin Çatmanın Azərbaycan millisindən ayrılması xəbərini ilk olaraq Prosport.Az saytı yayıb.