Yeniyetmə və gənc qızlardan ibarət voleybol millimizin baş məşqçisi Şahin Çatma ilə yollar ayrılıb.

Prosport.Az-ın xəbərinə görə, 2023-cü ilin yayından yığmamızı çalışdıran türkiyəli mütəxəssis dünən federasiyaya gələrək vidalaşıb.

O, həyat yoldaşının səhhətini əsas gətirərək ayrılmaq istədiyini bildirib.

Xatırladaq ki, onun çalışdırdığı U-18 millisi ötən ay İspaniyada Avropa çempionatının II təsnifat mərhələsində bütün rəqiblərə uduzub. Komandamız meydan sahibi İspaniya, Niderland və Estoniyaya 0:3 yenilib. Bundan başqa, onun qadınların Yüksək Liqasında mübarizə aparmış "Gənclər" komandası bütün turnir boyu rəqiblərdən 1 set belə almayıb.

Qeyd edək ki, onun türkiyəli köməkçiləri Zihni Türkay Taylan və statistik Birol Serimlə də yolların ayrılacağı gözlənilir.