"İmişli"nin portuqaliyalı baş məşqçisi Jorj Kaşkilyanın Prosport.Az saytına müsahibəsi

– Təlim-məşq toplanışı necə keçir?
– Məşqlər plan üzrə gedir. Hazırlıqların 1-ci mərhələsi fiziki yöndə çalışmalar idi. Çünki oyunçular 2 həftə istirahətdə olmuşdu. Bununla belə, futbolçuların fiziki durumu yaxşıdır. Çünki onlara individual proqram verilmişdi. Futbolçular bu proqrama riayət edib. 2-ci mərhələdə daha çox taktiki hazırlıq gedir. Çünki Premyer Liqada "Araz-Naxçıvan"la çətin oyunumuz var və bu matça hazır olmalıyıq.

– Yoxlama matçı keçirəcəksiniz?
– Cümə günü (bu gün) "Şəfa"ya qarşı yoxlama matçı keçirəcəyik. Bildiyiniz kimi, 1-ci yoxlama oyunumuz olub ("Şimal"la matçı nəzərdə tutur). Həmin matçda futbolçular özlərini yaxşı tərəfdən göstərdi. Bizim üçün maraqlı oyun idi və maraqlı da nəticə əldə etdik. 5:0 qalib gəldik. 2-ci oyuna daha ciddi hazırlaşacağıq. Çünki "Araz-Naxçıvan"la oyunda hansısa taktiki gedişatları tətbiq edəcəyik.

– Komandanın düşərgəsində baxışda əcnəbi futbolçular da var. Onlardan neçəsinin komandaya götürülmə ehtimalı var?
– Həmin futbolçuların çoxu gənc və təcrübəsiz olduqlarından, onlardan gözləntilərimiz çox deyil. Hələ ki onlara baxırıq. Amma hələ 2 həftə də vaxtları var ki, özlərini göstərsinlər. Hazırlığın 2-ci mərhələsində tələblərimiz sərt olacaq. Orada onlar barədə qərarlarımız özlərini necə göstərmələrindən asılı ola bilər.

– Yəqin həmin futbolçular "Şəfa" ilə matçda sınanılacaq...
– Əslində "Şəfa" ilə oyunda daha çox bizim Premyer Liqada oynatdığımız ilk "11-lik" oynayacaq. Çünki onları meydanda görməyimiz daha vacibdir.

– "İmişli"nin hansı mövqelərinin güclənməsinə ehtiyac var?
– Hücum xəttinin.

Səbuhi Musa