Azərbaycanda beynəlxalq futbol turniri keçiriləcək.

Prosport.Az-ın xəbərinə görə, ötən il Gənclər və İdman Nazirliyi tərəfindən yaradılmış "Ulduz" Futbol Akademiyasının təşkilatçısı olduğu "Ulduz Cup" 2-6 sentyabr tarixlərində Qubada baş tutacaq.

12 yaşadək komandalar (U-12) arasında keçiriləcək turnirdə reqlamentə əsasən 8 komandanın iştirakı nəzərdə tutulub. Ancaq sayın artımı da baş tuta bilər.

Quba Olimpiya İdman Kompleksinin stadionunda keçiriləcək yarışda Azərbaycandan "Ulduz", "Qarabağ", "Metak" (Qusar) komandaları iştirak edəcək. Xarici komandalardan isə "Alanyaspor" (Türkiyə), "Dinamo" (Minsk, Belarus), "Saburtalo" (Gürcüstan), "Bunyodkor" (Özbəkistan) və Şimali Kipr yığma komandası mübarizə aparacaq. Həmçinin, yarışda iştirak üçün dəvət Qazaxıstanın "Atırau" klubuna da təklif olunub. Oyunların hər taymı 30 dəqiqədən ibarət olacaq.

Qeyd edək ki, komandaların hava limanından Qubaya gəlməsi və ya geri qayıtması, o cümlədən qalma və qidalanma xərcləri təşkilatçılar tərəfindən çəkiləcək.