Ölkəmizi CEV Çempionlar Liqasında təmsil edəcək "Turan" voleybol klubunun (VK) büdcəsi artırılıb.

Prosport.Az-ın xəbərinə görə, bunu "Turan" VK-nın sahibi Fəlah Quliyev deyib.

Onun sözlərinə görə, Azərbaycan çempionu olan klubun büdcəsi qaldırılıb. Bu isə o deməkdir ki, klub növbəti mövsüm də ölkə çempionluğunu hədəfləməklə yanaşı, Avropanın 1 nömrəli klub turniri olan Çempionlar Liqasında maksimum irəliləməyi düşünür.

Bundan başqa, klub peşəkarlaşma yönündə daha bir addım atıb. Tovuzlu xalq artisti Tünzalə Ağayeva klub üçün mahnı yazıb.

Xorvatiyanın "Mladost" komandası ilə qarşılaşacaq "Turan" rəhbərliyi Tovuz Olimpiya İdman Kompleksini əsaslı şəkildə təmir etdirib. Bunun üçün 100 min manat ayrılıb. Yenilənmiş kompleksdə voleybol arenasının tutumu 1500 nəfərə çatdırılıb. Artıq tribunalar 3 tərəfdə də olacaq. Həmçinin, tablonun aşağısında da az sayda oturacaq tribunaları quraşdırılıb.

Qeyd edək ki, "Turan" Xorvatiya çempionu "Mladost"u Çempionlar Liqasının II təsnifat mərhələsi çərçivəsində oktyabrın 20-də qəbul edəcək. Matç saat 19:00-da başlayacaq. Cavab qarşılaşması isə oktyabrın 29-da Xorvatiyanın paytaxtı Zaqrebdə baş tutacaq.