"Sərhədçi" basketbol klubu dağılıb, onu əvəz edəcək komanda müəyyənləşib.

Prosport.Az-ın xəbərinə görə, Dövlət Sərhəd Xidmətinə məxsus komanda ötən mövsümün yekunlarına əsasən I Liqa kimi formalaşdırılan Azərbaycan Basketbol Liqası-2-də (ABL-2) mübarizə aparmalı idi.

Lakin klub basketbolda fəaliyyətini dayandırıb. Bu komandanı ABL-2-də ötən mövsüm Azərbaycan Həvəskarlar Liqasında (AHL) çempion olmuş "Alov Basket" əvəzləyəcək. Bu komanda mayın 13-də "Kaspi"ni finalda 86:65 məğlub edərək AHL çempionu olub.

Bundan başqa, yeniyetmə basketbolçularımızın oyun təcrübəsi qazanması üçün 16 (U-16) və 18 (U-18) yaşadək millilərimiz də bu yarışa qatılacaq.

Həmçinin, ötən mövsümün yekunlarına əsasən aşağı liqaya yuvarlanan "Sumqayıt"ın sponsor tapması səbəbindən "Şəki"ni ABL-də əvəz etməsi gözlənilir. Bu səbəbdən son Azərbaycan Kubokunun yarımfinalçısı olmuş "Şəki" ABL-2-də oynaya bilər. Lakin bunun üçün yaxın günlərdə federasiya tərəfindən yekun qərar verilməlidir.

Yeri gəlmişkən, ABL-2-də də legioner oynatmağa icazə veriləcək. Hər klub maksimum 2 legioner transfer edə bilər. Lakin bunlardan yalnız 1-i (1+4) eyni anda meydanda ola bilər. Xatırladaq ki, ABL-də 4+1 (4 legioner, 1 yerli) qaydası yeni mövsümdə də tətbiq olunacaq. 

Qeyd edək ki, 2026/27 mövsümü üçün ABL-də 8 komanda mübarizə aparacaq. Bunlar "Sabah", "LANDAU Layns", "Gəncə", "Neftçi", "Ordu", "Naxçıvan", NTD və "Şəki"/"Sumqayıt"dır. Çempionata oktyabrın 3-də start veriləcək.

ABL-2-də isə 6 komanda yarışacaq. Bunlar "Şəki"/"Sumqayıt", "Quba", "Lənkəran", U-16, U-18 milləri və  "Alov Basket" komandasıdır.