Yunan-Roma güləşində 67 kq çəki dərəcəsində 2-ci dəfə olimpiya 2-cisi olan Pərviz Nəsibovun Prosport.Az saytına müsahibəsi

– Bilirdik ki, 2-ci dəfə Olimpiada finalında qızıl medal qazanmaq istəyirdiniz. Ancaq bu dəfə də qismət olmadı...
– Sözün düzü, qızıldan başqa özümə medal gözləmirdim. Fikirləşirdim ki, finalda 100% qalib gəlməliyəm. Amma Allahın işidir. Qismətim belə imiş. Deməli, bundan da çox çalışmalıyam ki, qızıl medal qazanım. İdmandır, hər şey olur.

– Çempionluq üçün hansı detal sizə mane oldu?
– Tələskənliyə yol verdim. Hesabda öndə ola-ola tələsdim və iranlı rəqibimə xal verdim.

– Yarımfinalda Həsrət Cəfərov üzərində qələbəni qeyd etməyiniz sosial şəbəkələrdə fərqli cür yozuldu. Bu barədə nə deyə bilərsiniz?
– Komment yazmağa nə var ki... Mən də o kommentləri oxumuşam. Həmişə Pərviz Nəsibov deyiləndə bir azərbaycanlı olduğum öncə qeyd edilir. Mən də bir Azərbaycan övladıyam. Azərbaycan adını heç vaxt yerə salmamışam. Hər yerdə də demişəm ki, Azərbaycan mənim doğma evimdir. Amma belə xoşagəlməz kommentləri görəndə adam bir az pis olur. Həsrətlə münasibətim pis deyil. Onunla salam-sağolum var. Çoxu yazırdı ki, iranlı güləşçi ilə görüşdə finalda uduzmağımı istəyirlər. Bu mənə pis təsir etdi.

– Bu gün (dünən) medal kürsüsündə onunla qucaqlaşıb görüşdünüz...
– Mənim 25, onun 21 yaşı var. Yaşca ondan böyüyəm. Mən ona yalnız yaxşı yol göstərə bilərəm. İndiyədək heç bir Azərbaycan güləşçisinə pisliyim dəyməyib. Bu gün onu medal qazanması münasibəti ilə təbrik etdim. 21 yaşı var, gələcəyi qabaqdadır. Ukraynaya gəlsə, bilsin ki, öz evinə gəlib.

– Çox vacib görüşlərdən sonra gözünüzün şişmiş olduğunu görürük...
– Sözün düzü, 67 kq-da hamı cin kimi güləşir (gülür). İnanmıram ki, kimsə qəsdən mənə belə zədə yetirir. Əsas odur ki, güləş döşəyindən əliboş dönmədim. Pis o olardı ki, medalsız qalardım. 

– 2 final və 2-də də gümüş medal. Atalar 3-dən deyib. 4 il sonra sizdən Los-Ancelesdə qızıl medal gözləmək olar?
– Artıq axşam yatmağa qorxuram. Çünki final görüşünə baxacağam. Bilirəm ki, qızıl medalı necə əldən verdiyimə görə çox peşman olacağam. Amma yenə deyirəm ki, bu, Allahın işidir. Hələ 25 yaşım var və inanıram ki, Olimpiadalarda qazandığım 2 gümüşü 2028-ci ildə 1 qızıla dəyişəcəyəm.

– Ancaq nəzərə alın ki, Həsrət də növbəti Olimpiadaya iddialı gələcək...
– (gülür) Gəlsin... Qızıl medalı bölərik