"Təəssüratlarım yaxşıdır, Olimpiya üçüncüsü oldum. Məni dəstəkləyən və uğuruma sevinən hər kəsə təşəkkürümü bildirirəm”.

Prosport.Az xəbər verir ki, bu sözləri “Paris-2024” Yay Olimpiya Oyunlarında bürünc medal qazanan Həsrət Cəfərov deyib.
67 kq çəki dərəcəsində fəxri kürsüyə qalxan idmançı 3-cü yeri tutduğu üçün məyus olmadığını bildirib: “Sevinirəm, sadəcə, qızıl medalın yeri başqadır. Əsas odur, Vətənə medalsız dönmürəm. Komandamızın başı üzərində sanki “qara bulud” var. Medal qazana bilmirdik. Açılışı mən etdim, inanıram ki, davamını uşaqlar gətirəcəklər”.
O, Ukraynanı təmsil edən azərbaycanlı güləşçi Pərviz Nəsibovla yarımfinal görüşündə baş verənlərə də aydınlıq gətirib: "Buna söz-söhbət deməzdim. Mən uduzmağı sevmirəm. Məğlub olduğum insanla xoş rəftar edə bilmirəm. Ona görə belə şeylər baş verdi. Halbuki bizim aramızda heç bir problem yoxdur".

Cəfərov digər yunan-Roma güləşçilərimizin Olimpiadanı medalsız başa vurmasına da toxunub: "Olimpiya Oyunları elə yarışdır ki, burada zəif rəqib olmur. Hamısı güclü, seçilmiş idmançılardır. Ona görə də belə çətinlik oldu".

O, əsas hədəfinin “Los-Anceles-2028” Yay Olimpiya Oyunlarında qızıl medal əldə etmək olduğunu vurğulayıb: “Daha yaxşı hazırlaşıb böyük uğurlar qazanmaq istəyirəm”.