Azərbaycan "Paris-2024" Yay Olimpiya Oyunlarında növbəti medalı qazanıb.

Prosport.Az xəbər verir ki, bu dəfə fəxri kürsüyə taekvondoçu Həşim Məhəmmədov (58 kq) qalxıb.

Mübarizəyə 1/8 finaldan başlayan idmançımız ilk görüşündə irlandiyalı Cek Uolleyə qalib gəlib. Ardınca ispaniyalı Adrian Visenteni üstələyən taekvondoçumuz yarımfinalda İtaliya təmsilçisi Vito Delakviladan güclü olub.

Finalda Cənubi koreyalı Park Taeçjunu sınağa çəkən Məhəmmədov ilk hissədə ayağından ciddi zədə alıb. Görüşü davam etdirə bilməyən idmançımız yekunda məğlub elan edilib və gümüş medalla kifayətlənib.

Qeyd edək ki, bununla da Azərbaycan idmançılarının Paris Olimpiadasında qazandığı medalların sayı 4-ə çatıb. Daha əvvəl cüdoçular Hidayət Heydərov (73 kq) və Zelim Kotsoyev (100 kq) Olimpiya çempionu adını qazanıb, boksçu Loren Alfonso (92 kq) isə finala vəsiqə qazanmaqla ən azı gümüş mükafatı təmin edib.

19:19

Azərbaycan taekvondoçusu Həşim Məhəmmədov Fransanın paytaxtı Parisdə təşkil olunan Yay Olimpiya Oyunlarında finala yüksəlib.

Prosport.Az xəbər verir ki, 58 kq çəki dərəcəsində yer alan idmançı yarımfinalda italiyalı Vito Dellakvila ilə qarşılaşıb.

Hər iki hissədə rəqibindən üstün olan Məhəmmədov yekunda qələbə qazanıb - 9:4, 11:1.

Bu nəticədən sonra taekvondoçumuz ən azı gümüş medalı özü üçün təmin edib.

Qeyd edək ki, Paris-2024 avqustun 11-də başa çatacaq. İndiyədək Cüdoçular Hidayət Heydərov (73 kq) və Zelim Kotsoyev (100 kq) olimpiya çempionu olublar. Boksçu Alfonso Dominqes (92 kq) finala yüksəlməklə ən azı gümüş mükafatı təmin edib.

17:57

Azərbaycan taekvondoçusu Qaşım Maqomedov Fransanın paytaxtı Parisdə təşkil olunan Yay Olimpiya Oyunlarında növbəti görüşünü keçirib.

Prosport.Az xəbər verir ki, 58 kq çəki dərəcəsində yer alan idmançı 1/4 final mərhələsində ispaniyalı Adrian Visente ilə üz-üzə gəlib.

Rəqibinə 2:0 hesabı ilə qalib gələn Maqomedov yarımfinala yüksəlib.

Qeyd edək ki, Paris-2024 avqustun 11-də başa çatacaq. İndiyədək Cüdoçular Hidayət Heydərov (73 kq) və Zelim Kotsoyev (100 kq) olimpiya çempionu olublar. Boksçu Loren Alfonso (92 kq) finala yüksəlməklə ən azı gümüş mükafatı təmin edib.

14:31

Azərbaycan taekvondoçusu Həşim Məhəmmədov “Paris-2024” Yay Olimpiya Oyunlarında mübarizəyə başlayıb.

Prosport.Az xəbər verir ki, 58 kq-da çıxış edən idmançı 1/8 finalda irlandiyalı Cek Uolleylə qarşılaşıb.

Rəqibini 2:0 (7:4, 12:6) hesabı ilə məğlub edən taekvondoçumuz adını növbəti raunda yazdırıb.

Qeyd edək ki, hazırda Azərbaycanın aktivində üç medal var. Cüdoçular Hidayət Heydərov (73 kq) və Zelim Kotsoyev (100 kq) Olimpiya çempionu olublar, boksçu Loren Alfonso (92 kq) isə finala vəsiqə qazanmaqla ən azı gümüş mükafatı təmin edib.