"Finala çıxmaq üçün əlimdən gələni etdim".

Prosport.az xəbər verir ki, bu sözləri Azərbaycan boksçusu Loren Alfonso "Paris-2024"də finala vəsiqə qazanması ilə bağlı fikirlərini bildirərkən deyib.

Boksçu qızıl medal qazanmaq üçün əlindən gələni edəcəyini vurğulayıb: "Çox gərgin döyüş keçdi. Finaldan gözləntilərim qızıl medaldır. Əsasən "2-ci nömrə" ilə çıxış edən boksçuyam. İlk gündən məhz belə işləmişəm. Gözləyirəm ki, rəqib üzərimə gəlsin və zərbələrdən yayınım. Bu gün də belə etdim və qələbə qazandım. Şəxsi kateqoriyam 86 kq çəki dərəcəsidir. İndi döyüşdüyüm kateqoriyada yeniyəm. "Paris-2024"də mənim yarışdığım kateqoriya olmadığına görə 92 kq çəki dərəcəsində döyüşürəm. Məsuliyyət var, əlimdən gələni edəcəyəm ki, qızıl medal qazanım".

Qeyd edək ki, Loren Alfonso yarımfinalda İspaniyanı təmsil edən kubalı həmyerlisi Enmanuel Reyes üzərində qələbə qazanmaqla finala yüksəlib. Həlledici qarşılaşma avqustun 9-da baş tutacaq.