"Sumqayıt", qayıt qəsdinə...
"Qostinitsa" (Mehmanxana) sözünü özündə ehtiva edən bu sözlər "Həm ziyarət, həm ticarət" filmində rəhmətlik xalq artisti Nuriyyə Əhmədovaya aiddir. Dünən "Sumqayıt"ın Macarıstandakı oyunundan sonra nədənsə Nuriyyə xanımın bu sözləri beynimdə səsləndi...
Bəli, "Sumqayıt" ötən mövsüm arzusuna çatdı. Nə yolla olur-olsun, avrokuboklara çıxdı və oynadı. Ancaq bundan nə qazandı? Təcrübə? Əlbəttə ki, yox. Riad Rəfiyevin vaxtında komanda artıq 3-cü dəfə avrokuboklara vəsiqə qazanırdı. Yəni, bu komandanın avrokubok təcrübəsi də vardı, yaxşı məşqçisi də. Ancaq klubun yeganə çatışmazlığı bu idi ki, hələ də bişmiş rəhbərliyi yoxdur.
Klub avrokuboklara çıxır, komanda uğur qazandığı futbolçularını göndərir. Onların başında Danimarkanın "Vayle" klubuna gedən yapon mərkəz yarımmüdafiəçisi Masaki Murata gedir. Yerinə isə gələnlər o deyillər. Bu, "Şkendiya" ilə, "Çukariçki" ilə oyunlar vaxtında da belə olub, indi də.
Monteneqrolu hücumçu Nikola Vuynoviçi meydanda görən oldu? Adam hər oyunda sarı vərəqə alması ilə yadda qaldı. Göndərilən eston Erik Sorqanın "ölüsü" belə Vuynoviçin "diri"sindən gözəl idi mənə görə.
Ümumiyyətlə, komandada seleksiya işi o qədər bərbad alınıb ki, elə başa düşülür ki, yeni transferlər sanki elə Premyer Liqa üçün edilmişdi. İlk oyunda Vuynoviç, bosniyalı sol cinah müdafiəçisi Slavişa Radoviç, braziliyalı dayaq yarımmüdafiəçisi Fernandu Medeyrus və Rəhim Sadıxov 2-ci hissədə əvəzləndilər. Bu isə o deməkdir ki, bu futbolçular hələ yeni komanda üçün hazır deyildilər. Nə ilk oyunda, nə də cavab oyununda özlərini göstərə bildilər.
Səbuhi Abdullazadənin heç bir taktiki üslubun nəticəsi olmayan qolunu saymasaq, "Sumqayıt" hər iki matçda aciz göründü və "Fehervar" hər iki oyunda qələbəni haqq edən tərəf idi. Cavab matçında əvəzetmələrin 90+2-ci dəqiqədə edilməsi Samir Abasovun B planı üçün əlində lazımi heyətin olmamasına görə idi.
Ancaq bu məsələdə Samir Abasovun da günahı az deyilmi? Hər zaman açıqsözlülüyü ilə seçilən Abasov menecerlik qabiliyyətini də bu illərdə mənimsəmiş rəhbərinə demir ki, bu nə oyunçulardır mənim üçün gətirmisən, budur sənin futbolçu seçimin? Sanki o da elə bundan razıdır. "Neftçi"dəki avrokubok təcrübəsi zamanı da onun rəhbərliyi vaxtında transfer edə bilməyib onu oda atmışdı, indi də. Deməli, adamın da sözü bəzi hallarda keçmir.
Bəli, "Sumqayıt" "Zirə" və "Sabah"dan fərqli olaraq, avrokuboklara hazır deyildi. Avrokubok sənin şəhərin, sənin azarkeşin, sənin stadionun üçün ömür boyu 1 mərhələdən ibarət olacaqsa, ötən mövsüm bu qədər canfəşanlığa, çığır-bağıra nə halət vardı ki? Ona görə də, "Sumqayıt", eşidirsən? Qayıt, gəl qəsdinə. Premyer Liqa səni gözləyir. Sənin yerin elə oradır. Amma sən sən ol, bir də avrokubok adı çəkmə. Nə qədər bu rəhbərlik var, dilinin ucuna da gətirmə. Qoy haqqı olanlar orada yer alsın...
Vasif Şükür