"Qarşıya baxmalı və digər oyunlara hazırlaşmalıyıq".

Prosport.Az xəbər verir ki, bunu badminton üzrə Azərbaycan millisinin baş məşqçisi Morteza Validarvi Paris-2024 Yay Olimpiya Oyunlarında Keyşa Fatimə Azzəhranın ilk matçından sonra deyib.

Mütəxəssis N qrupunda He Bin Çzyaoya (Çin) uduzan idmançının rəqibi ilə müqayisədə təcrübəsinin az olduğunu bildirib: "Çinli idmançı buraya qızıl medal qazanmaq üçün gəlib. Olimpiya təcrübəsi də var. Ayın 29-da yaxşı nəticə əldə etmək üçün çalışacağıq”.

Validarvi digər badmintonçu Ade Reski Dvikahyonun da şanslarını dəyərləndirib: “Adenin təcrübəsi Keyşadan yaxşıdır. Onun olimpiya təcrübəsi də var. Uğur qazanmaq üçün çox istəklidir və bu yarışlara hazırdır. Dünən də onunla danışarkən bütün qarşılaşmaları qazanmaq gücünə malik olduğunu dedi. İnanıram ki, ayın 29-da Azərbaycan badmintonu üçün xoş xəbər verərik".

Qeyd edək ki, Ade Reski Dvikahyo ilk görüşünə iyulun 29-da çıxacaq. Keyşa Fatimə Azzəhranın də 2-ci görüşü eyni günə təsadüf edəcək.