"İşlərimin çoxluğu ilə əlaqədar olaraq "Neftçi"dən ayrıldım. Film çəkilişlərinin çoxu Rusiyanın Sankt-Peterburq şəhərində, Mərakeş və Hindistanda olduğundan, "Neftçi" TV-yə vaxt ayıra bilməyəcəkdim. Ona görə də ayrılmaq qərarı verdim".

Bunu Prosport.Az saytına açıqlamasında "Neftçi" TV-nin sabiq rəhbəri, kinoaktyor Kamran Ağabalayev deyib.

O, klubu tərk etməsinin "Neftçi"ni AFFA-ya dəyişən Aysu İbrahimli ilə əlaqədar olmadığını bildirib: "Yox, elə olsaydı, onunla birgə ayrılardım. O məndən qabaq "Neftçi"dən gedib. Bunun o məsələyə aidiyyəti yoxdur. Ayrılmağım çəkilişlərlə bağlıdır. Şəxsi qərarımdır. Hazırda Sankt-Peterburqdayam. Çəkilişlər 8 ay davam edəcək. Ondan sonra "Netflix"in layihəsi də var. Kim məni bu qədər gözləyər? "Neftçi"yə keçəndə də öncədən demişdim ki, öz karyeram da var.

Hər zaman "Neftçi" azarkeşi olaraq qalacağam. Bundan sonra da lazım olarsa, kluba kömək etməyə hazıram".

44 yaşlı Kamran Ağabalayev işlədiyi təxminən 1 illik müddətdə işinin öhdəsindən gəldiyini bildirib: "Mən düşünürəm ki, işimin öhdəsindən çox gözəl gəldim. Ümumiyyətlə, qarşımıza qoyduğumuz planlar çox idi. Mənim orada olub-olmamağımdan asılı olmayaraq, uşaqlar o planları yerinə yetirəcəklər. Bir sözlə, əvvəl də biz yox idik, "Neftçi" vardı. İndi də "Neftçi" olacaq. Ona görə də hər bir halda "Forza Neftçi"!

Qeyd edək ki, bazar ertəsi keçirilən klubdaxili iclasdan sonra bəzi şəxslərlə yollar ayrılıb. Klubun mətbuat katibi Emin Əfəndi onların sırasındadır. Əvəzində klubda yeni təyinat reallaşıb. Bu, "Neftçi"nin sabiq mətbuat katibi Rüstəm Əfsərlidir. "CBC Sport"u "Neftçi"yə dəyişən Əfsərli klubda media üzrə koordinator təyin olunub. Onun vəzifəsinin nədən ibarət olduğu açıqlanmasa da, "Neftçi"də Aysu İbrahimlinin gedişi ilə ləğv olunan Kommunikasiyalar üzrə direktor funksiyasını icra edəcəyi gözlənilir.

Xatırladaq ki, daha əvvəl administrativ işlər üzrə direktor Səbuhi Rzayevlə yollar ayrılmışdı. O, ötən il sentyabrın 26-da klubun yeni strukturu təsdiqlənəndə təyinatı açıqlanan şəxslər arasında idi.

Səbuhi Musa