AFFA İcraiyyə Komitəsinin iyunun 3-də Azərbaycan Kubokunun finalı öncəsi "Bakcell Arena"da keçirdiyi fövqəladə iclas zamanı verdiyi qərarlardan daha biri məlum olub. Qurum saytı vasitəsilə yalnız II divizionun yaradılması ilə bağlı AFFA baş katibliyinə və PFL-ə tapşırıq verildiyini bildirsə də, digər qəbul edilən qərarı gizlədib.

Prosport.Az saytının xəbərinə görə, buna səbəb AFFA ilə dövlət qurumu olan Gənclər və İdman Nazirliyi arasında yaranan narazılıqdır.

Belə ki, FIFA və UEFA-dan ayrılan maliyyə vəsaiti ilə AFFA Tərtər şəhər stadionunda təmir işləri aparmaq qərarı verib. Hələ fevralın 27-də AFFA 2000-2500 tamaşaçı tutumuna malik olacaq stadionun təmiri ilə bağlı tender elan edib, aprelin 5-dək işin təhvil verilməsini istəyib. Qalib şirkət müəyyənləşsə də, təmir işləri aparılsa da, nazirlik sonradan bu stadionun onların balansında olduğunu bildirib. Qanunən ictimai birlik olan AFFA isə dövlət qurumu ilə baş-başa gəlmək istəmədiyindən, geri çəkilməli olub. Bu səbəbdən ötən ay təmir dayandırılıb. Yeri gəlmişkən, təmir işlərinin dayandırılması barədə ilk xəbəri futbolinfo.az saytı ictimaiyyətin diqqətinə çatdırıb. Həmin materialda AFFA-nın mətbuat xidmətindən xəbər təsdiqlənib. 

İcraiyyə Komitəsinin son iclasında FIFA və UEFA-dan ayrılan həmin pulun AFFA balansında olan stadionlara ayrılmalı olduğu barədə qərar verilib. Belə ki, həmin maliyyə vəsaitinin Binə stadionu, Mərdəkandakı "Dalğa Arena" və 8-ci km qəsəbəsindəki "Bakcell Arena"dakı təmir işlərinə yönəldilməsi bildirilib. AFFA tərəfindən müvafiq qərarın açıqlanması nazirliyin stadionun təmir işlərinə müdaxiləsinə işarə verəcəkdi. Bu səbəbdən onsuz da əskisi tüstülü olan AFFA özlərinə əlavə problem yaratmaq istəməyərək qərarı gizlətməyə çalışıb. 

Qeyd edək ki, yaxın günlərdə AFFA İcraiyyə Komitəsinin daha bir iclası keçiriləcək. Həmin iclasda Azərbaycan futboluna təsir edəcək köklü qərarların çıxarılacağı gözlənilir.

Səbuhi Musa