Bu gün AFFA İcraiyyə Komitəsinin üzvləri rəsmi şəkildə açıqlandı. Demək olar ki, yeni 9 üzvdən 7-si bizə tanış simadır.
Belə ki, "Neftçi" veteranı olan Səməd Qurbanov həmin klubun Müşahidə Şurasının üzvü, Qurban Qurbanov "Qarabağ"ın baş məşqçisi, Maqsud Adıgözəlov "Sabah"ın prezidenti, Balakişi Qasımov İTV-nin baş direktoru və Qılıncoynatma Federasiyasının prezidenti, Sərxan Hacıyev AFFA-nın baş katibi (Elxan Məmmədov kimi həm də AFFA-nın icraçı vitse-prezidenti olacağı gözlənilir və yaxud baş katib postundan ayrılacaq – red.), Zaur Axundov "Silk Way Holding"in rəhbəri və AZAL klubunun əvvəlki prezidentlərindən biri, Ülvi Mansurov Beynəlxalq Bankın İdarə Heyətinin sədr müavini və bəstəkar Eldar Mansurovun oğlu kimi tanınır.
Bəs digər 2 yeni namizəd kimdir? Prosport.Az bunu araşdırıb.
Xəyal Cəfərov Peşəkar Futbol Liqası İctimai Birliyi tərəfindən ayrılmış 5 yer üçün adı təqdim olunan şəxslərdən biridir. Dəqiqləşdirsək, İcraiyyə Komitəsinə namizədliyi "Sumqayıt" klubu tərəfindən irəli sürülüb. Daha əvvəl mətbuatda Sumqayıt şəhər stadionunun direktoru Nadir Quliyevin ola biləcəyi, amma bunun dəqiq olmadığı bildirilsə də, sonda namizəd kimi onun adı verildi.
Xəyal Cəfərov AFFA prezidentliyinə "Neftçi" tərəfindən namizədliyi irəli sürülmüş (bu klubun Müşahidə Şurasının üzvüdür – red.) SOCAR prezidenti Rövşən Nəcəfin kadrı hesab olunur. Belə ki, o, "SOCAR karbamid" zavodunun direktoru olub. Sumqayıt Kimya Sənaye Parkının ərazisində inşa olunmuş zavodun açılışı 2019-cu ilin yanvarın 16-da olub və burada ölkə başçısı İlham Əliyev zavodu rəsmən işə salıb (“SOCAR karbamid” zavodunun ümumi dəyəri təxminən 800 milyon avro təşkil edir. Zavodun inşası zamanı bir sıra beynəlxalq banklardan dövlət zəmanəti əsasında 500 milyon avro məbləğində vəsait cəlb edilib). O vaxtdan ötən ilin iyulunadək zavodun direktoru məhz X.Cəfərov olub. Ötən ildən o, SOCAR-ın Heydər Əliyev adına Neft Emalı Zavodunun direktorudur. O, yeni üzv kimi AFFA-nın vitse-prezidenti və Məşqçilər Komitəsinin sədri Vaqif Sadıqovu əvəzləyəcək.
Leyla Xəlilova-Rzazadənin namizədliyi Sahə Futbol Federasiyaları İctimai Birliyi, daha dəqiq desək, Azərbaycan Tələbə Futbol Federasiyası tərəfindən irəli sürülüb. Əvvəl bu postda elm və təhsil naziri Emin Əmrullayevin müavini olan Firudin Qurbanov idi. Onu yenə eyni nazirlikdən kiminsə əvəzləyəcəyi bəlli olsa da, yeni şəxsin adı məlum deyildi.
Bəs bu xanım kimdir? Leyla Xəlilova-Rzazadə Elm və Təhsil Nazirliyinin Strateji planlaşdırma və icraya nəzarət şöbəsinin müdiridir. Ancaq onun qarşısında S.İ.E. qeydi də var. Yəni, səlahiyyətləri icra edən şəxsdir. Bu, nazirliyin saytında olan bənddir. O həmçinin digər mənbədə Təhsil islahatlarının koordinasiyası sektorunun müdiri, Elm və Təhsil Nazirliyinin gender məsələləri üzrə məsul şəxsidir. L.Xəlilova-Rzazadə 2021-ci ilin oktyabrında 1-ci “Yüksəliş” müsabiqəsinin qalibi olub. Həmin vaxtdan etibarən onun nazirlikdə iş təcrübəsi başlayıb. Onun AFFA İcraiyyə Komitəsinə üzvlüyü ilə bu qurumda qadınların sayı 2-yə çatacaq. Belə ki, İctimai Futbol Təşkilatları İctimai Birliyi tərəfindən AFFA-nın Beynəlxalq Əlaqələr Şöbəsinin müdiri Könül Mehtiyevanın namizədliyi yenidən irəli sürülüb.
Qeyd edək ki, AFFA prezidentliyi və İcraiyyə Komitəsi üzvlüyünə seçki aprelin 2-də keçiriləcək.
Səbuhi Musa
