Milli Olimpiya Komitəsində Olimpiya çempionu, Azərbaycan Atıcılıq Federasiyasının və Milli Olimpiya Komitəsinin vitse-prezidenti Zemfira Meftahətdinovanın 60 illik yubileyi əlaqədar tədbir keçirilib. Tədbirdən sonra Zemfira Meftahətdinova jurnalistlərin suallarını cavablandırıb.

Prosport.Az həmin müsahibəni təqdim edir:

– Mənim üçün bu gün böyük, möhtəşəm bir bayram oldu. Haqqımda xoş sözlər deyildi. Öncə cənab Prezidentə və Birinci vitse-prezidentə diqqət və qayğıya görə minnətdaram. Çünki bu, idmançılar üçün çox vacibdir. Ölkəmizdə idman sevilir, inkişaf edir. Belə bir gün təşkil etdikləri üçün Milli Olimpiya Komitəsinə təşəkkürümü bildirirəm. Atıcılıq Federasiyasına minnətdarlığımı bildirirəm. Daxili İşlər Nazirliyinin rəhbərliyinə minnətdaram. Mənə elə gəlir ki, çox şərəfli yol keçmişəm. Çünki dövlətdən də mükafatlar almışam və dostlarım mənə çox xoş sözlər söylədilər. Xoşbəxt insanam.

– Daxili İşlər Nazirliyindən ayrıldınız. Azərbaycan Atıcılıq Federasiyasında və Milli Olimpiya Komitəsində vitse-prezident fəaliyyətinizi davam etdirəcəksiniz?
– Əlbəttə. Mən həmişə idmandayam. Öz həyatımı idmana qurban verirəm. Hər zaman idmançılarla birgə olacağam. Bütün idmançılarımıza uğurlar arzu edirəm. Arzum budur ki, onlar olimpiadada uğurlu çıxış etsinlər və xalqımızı sevindirsinlər. İnanıram ki, belə də olacaq.

– Çoxlu təbriklər aldınız. Ən yadda qalan hansı oldu?
– Hər təbrik mənim üçün çox xoşdur. Burada dostlarım yığışıb. Hər kəs ürək sözlərini söyləyirdi. Hiss etdim ki, bunlar ürəkdən gəlir. Hər təbrik mənim üçün önəmlidir.