"Qarabağ"ın müdafiəçisi Elvin Cəfərquliyevn Prosport.Az-a müsahibəsi:

– Bu, sizin "Qarabağ"da 2-ci çempionluğunuzdur. Mövsümü necə dəyərləndirirsiniz? İlk və indiki çempionluq arasında fərq nədədir?
– Asan çempionluq olmur. "Qarabağ" komanda olaraq, ailə kimi zəhmət çəkdi və bunun da bəhrəsini gördük. Məncə, bu il daha çətin oldu. Amma dediyim kimi, asan çempionluq olmur. Sadəcə, müqayisə etsək, bu il gərgin oldu. "Sabah" bizə bu il çətinlik yaratdı. "Neftçi" ötənilki kimi çıxış etməsə də, onlarla da çətin oyunumuz oldu. Çətin çempionluq insana daha şirin gəlir, zövq verir.

– Sizə də xaricdən maraq olduğu bildirilir. Karyeranızı "Qarabağ"da görürsünüz?
– Karyeram barədə çox danışmaq istəmirəm. 2 illik müqaviləm var. Gələcək barədə bir söz deyə bilmərəm. Menecerim belə məsələlərlə məşğul olur. Hələ ki "Qarabağ"dayam, burda çox xoşbəxtəm. Burada bir ailə qazanmışam.

– Mövsümün ən maraqlı, ən çətin oyunu hansı oldu?
– Ən maraqlı "Sabah"la evdəki oyun oldu. 4:3 hesablı qələbə qazandıq. Çox maraqlı qollar izlədik.

– Özünüz üçün ən məhsuldar mövsüm oldu...
– Bəli. Bu mövsüm 5 qol vurdum, səhv etmirəmsə, 7-8 assist etdim. Mövsüm mənim üçün məhsuldar keçdi.

– Toral Bayramovla rəqabət sizə üstünlük yaradır?
– Əlbəttə, rəqabət çox önəmlidir. Rəqabət olan yerdə inkişaf olur. Ona görə də mənim üçün bu rəqabət mənə çox xoşdur.

– Avrokuboklarda potensial rəqiblərə yəqin ki baxmısınız. Hansı rəqibləri istəyirsiniz?
– Reytinqdə aşağı olan klubların düşməsini istərdim. Amma asan rəqib yoxdur. Çempionlar Liqasında öz ölkəsinin 1-ciləri gəlir. Yaxşı hazırlaşmalıyıq.

– "Qarabağ"ın ziyafət günü mini musiqi yarışında iştirak etdiniz. Yəqin daha o mahnının sözlərini öyrənəcəksiniz...
– (gülür) Orda ən çətin sözləri olan mahnı mənə düşdü. Məncə, Qara Qarayevlə Rişard Almeydaya asan düşmüşdü. Onlar mənə düşsəydi, daha asan ifa edərdim. Gedib öyrənərəm (gülür) (həmin video).

Səbuhi Musa