Bu gün Azərbaycan Bodibildinq və Fitnes Federasiyasının növbədənkənar Ümumi Yığıncağı baş tutacaq.
Prosport.Az-ın xəbərinə görə, Gənclər və İdman Nazirliyinin inzibati binasında sözügedən federasiyanın İdarə Heyətinə yeni üzvlər seçiləcək. Seçki zamanı federasiyanın prezidenti və vitse-prezidentləri də müəyyənləşəcək. Həmçinin, 1 üzvün vəzifəsindən azad olunması da gündəlikdə duran məsələlərdəndir.
Ötən ayın sonlarında nazirliyin kollegial iclasının qərarı ilə pauerliftinq, stronqmen və qol güləşi idman növləri və onların fənləri Bodibildinq və Fitnes Federasiyasının fəaliyyət istiqamətinə əlavə edilib. Məhz bu seçki zamanı bu 3 idman növü üzrə rəhbər şəxslər müəyyənləşdiriləcək.
Pauerliftinq Federasiyasının prezidenti Ələddin Əliyev və Qol Güləşi Federasiyasının prezidenti Cəsarət Əhmədov yeni İdarə Heyətində yer almayacaq. Onları müvafiq olaraq Raif Süleymanov və armrestlinq üzrə usta idmançı Azər Məhərrəmov (Milli Qəhrəman "Fred Asif" kimi tanınmış Asif Məhərrəmovun oğlu – red.) əvəzləyəcək. Stronqmen üzrə sahəyə isə yenə əvvəlki tək bu federasiyanın prezidenti Bəxtiyar Quliyev rəhbərlik edəcək.
Rauf Bünyatəliyev Bodibildinq və Fitnes Federasiyasının prezidenti kimi fəaliyyətini davam etdirəcək. Adlarını qeyd etdiyimiz şəxslər isə İdarə Heyətində yer almaqla yanaşı, Bünyatəliyevin vitse-prezidentləri olacaq.
Qeyd edək ki, Gənclər və İdman Nazirliyi Pauerliftinq, Stronqmen və Qol Güləşi Federasiyalarını akkreditasiyadan keçirməyib və onların ölkə daxilində yarış keçirmək hüququ əllərindən alınıb. Hər 3 quruma daha çox klub modelinə bənzəyən ictimai birlik statusunda fəaliyyət göstərmələri tövsiyə olunub.
İlkin