"Qəbələ"nin ötən yay heyətinə qatdığı mərkəz müdafiəçisi Lukas Afriku Portuqaliya mətbuatına müsahibə verib. 28 yaşlı braziliyalı futbolçu məşhur "A Bola" nəşrinə müsahibəsində "Qəbələ" karyerasından, "Braqa"nın UEFA Avropa Liqasındakı rəqibi "Qarabağ"dan danışıb.

Prosport.Az ölkəmizə gələnədək Portuqaliyada "Maritimu", "İşturil Praya" kimi klublarda 5 il çıxış etmiş futbolçunun müsahibəsinin Azərbaycanla bağlı olan hissəsini tərcümə edib.

– Portuqaliyada biz soyuqdan şikayətlənirik. Qəbələdə, Azərbaycanda, danışdığımız vaxt axşam saat 5-də neçə dərəcə var?
– Mənfi 1, soyuqdur (gülür).

– Düşünürəm ki, bu ən böyük problemlərdən biridir. Bu təcrübədə başqa nə ilə qarşılaşdınız?
– Bəli, soyuq da onlardan biridir. Amma sosial həyat da belədir. Portuqaliyada ölkə olaraq oynamaq mənə asan idi. Ölkə Braziliyaya bənzəyir, eyni dili paylaşırıq, insanlar arasında əlaqələr yaratmaq asandır. Azərbaycanda isə mədəniyyət fərqlidir, müəyyən çətinliklər yaşadım. Amma burada oynayan və evimə yaxın olan bəzi braziliyalılarla görüşməyim işimi bir az asanlaşdırdı. Bu yeni təcrübədən həzz alıram və bundan maksimum yararlanmaq istəyirəm.

– Ən çox nə üçün darıxırsınız?
– Sosial həyatım, dostlarla olmaq, onlara daha yaxın olmaq, daha qısa səfərlərə imkan verən bir yerdə olmaq üçün. Amma buradakı təcrübəç çox gözəl oldu. Futbol bir az fərqlidir. Lakin o həm də çox standardlaşdırılıb və burada rəqabətin səviyyəsi məni müsbət mənada təəccübləndirib, yaxşı komanda və oyunçular var. 5 il Portuqaliyada oynamışam, Avropa futboluna öyrəşmişəm. Azərbaycan da oradan geri qalmayıb, bura da yaxşıdır.

– İndi Kleziu ilə birlikdə "Qəbələ"də olacaqsınız...
– O hələ çıxış edəcək (Kleziu Mozambik yığması ilə Afrika Millətlər Kubokunda çıxış edir).

– “Qəbələ” də “Braqa”nın Avropa Liqasının pley-off mərhələsindəki rəqibi “Qarabağ”la artıq 2 dəfə üz-üzə gəlib. Və hətta həmin komandaya qol da vurmusunuz...
– Bəli, bunu etmişəm. Ölkənin ən böyük komandasıdır. Çox yaxşı oyunçuları var, bunlardan bəziləri – Juninyu, Rişard və ya Juliu Romau kimi futbolçular Portuqaliyada oynayıb. Onlar "Braqa"nı yaxşı tanıyır. Çox yaxşı bərabər səviyyəli, 2 çox bacarıqlı komanda qarşılaşacaq.

– “Qarabağ”ın güclü tərəfləri nələrdir?
– Onların yaxşı məşqçisi var, hücumlarda çox yaxşı, çox sürətli, çox adamla hücuma keçirlər. Həm də müdafiə etməyi də bilirlər, çox aqressivdirlər. "Braqa" ilə bərabərlik onlar üçün çox yaxşı olacaq.

– Bəs Portuqaliyada oynamış bu futbolçularla danışırsınız?
– Bəli, danışıram, Juninyu və Rişardla möhkəm dostluğum var. Bir neçə dəfə onlarla görüşüb nahar etmişik. "Braqa" ilə oynayacaqlarını biləndə çox sevindilər. Çətinliklərlə qarşılaşacaqlarının fərqindədirlər, lakin Portuqaliya həmişə xoş xatirələr gətirir.

– "Qəbələ" ilə nə vaxta qədər müqaviləniz var?
- İyun ayına qədər. Müqaviləmi daha 1 il artırmaq üçün seçim imkanım var.

– Portuqaliyaya qayıtmaq istərdinizmi?
– Gələcək Allaha məxsusdur. O fürsət gəlsə, yaxşı təkliflər olsa, təbii ki, bu haqda düşünəcəyəm, Portuqaliyaya qayıtmağa hazır olacağam. Mənim bu ölkəyə böyük sevgim var. Ölkəni və liqanı yaxşı tanıyıram. Bunlar qərar vermək üçün təhlil etməyiniz lazım olmayan amillərdir.