Azərbaycan Taekvondo Federasiyasında vitse-prezidentlərdən sayında azalma olub.

Prosport.Az-ın əldə etdiyi məlumata görə, Nağı Səfərov işindən azad edilib. 

Ötən ilin may-iyun aylarında Bakıda keçirilmiş dünya çempionatındakı fiasko nəticədən sonra federasiya prezidenti Kəmaləddin Heydərov tərəfindən "qələmi qırılmış" Nağı Səfərovun əvvəl səlahiyyətləri azaldılıb. İyunun 20-də Fövqəladə Hallar Nazirliyində (FHN) katibliyin rəisi, polkovnik olan Hikmət Səmədov yeni vitse-prezident təyin olunmaqla həmin səlahiyyətlər ona verilib. Bu dəfə isə onun tamamilə işindən ayrılmasına dair qərar verilib. Qərar rəsmi şəkildə yaxın günlərdə açıqlanacaq.

N.Səfərovun gedişi ilə Taekvondo Federasiyasında vitse-prezidentlərin sayı 2-yə enmiş olub. Hazırda Hikmət Səmədovdan başqa, dünya və ikiqat Avropa çempionu Niyaməddin Paşayev də vitse-prezident vəzifəsində çalışır.

Qeyd edək ki, Nağı Səfərov əvvəllər Taekvondo Federasiyasında məsul katib işləyib. O, 2012-ci ilin sonlarında hazırda FHN İdman-sağlamlıq klubunun rəisi işləyən polkovnik Füzuli Musayevin yerinə vitse-prezident təyin olunub. Xarici dil biliyinə görə onun əsas işi beynəlxalq əlaqələr üzrə olub. Nağı Səfərov həm də 2011-ci ildən Azərbaycan Boks Federasiyasının baş katibidir.

Səbuhi Musa