Dövlət Gömrük Komitəsinin sədri, gömrük xidməti general-leytenantı Şahin Bağırovun Azərbaycan Voleybol Federasiyasına prezident seçilməsindən sonra islahatlar davam edir.

Bu həftə qadın voleybolçulardan ibarət millinin baş məşqçisi postunu "Qalatasaray"ın sabiq çalışdırıcısı Ataman Güneyligilə həvalə edən yeni federasiya prezidenti klublarda da islahatlara başlayıb.

Prosport.Az-ın əldə etdiyi məlumata görə, Cavid Qurbanovun rəhbərliyi vaxtında federasiyadan maliyyələşən bütün klublara müstəqillik verilməsinə qərar verilib. Bunun üçün 3 kluba yeni sponsor tapılmasına başlanılıb.

Lakin bu məsələ bir qədər kortəbii şəkildə həyata keçirilir. Belə ki, "Murov", "Abşeron" və "Azərreyl"in klub prezidentlərindən tutmuş ən aşağı maaş alan əməkdaşlarına kimi hamı işdən çıxarılıb. Səbəb isə odur ki, yeni sponsor özü istəsə, bu əməkdaşlarla davam edəcək, onlarla yeni əmək müqavilələrinin bağlanmasına razılıq verəcək.

Saytımız artıq bu klublardan 2-nə hansı şirkətin sponsorluq edəcəyi və hansı şəxsin klub prezidenti olacağını müəyyənləşdirib. Sadəcə, son dəqiqləşdirmə aparıb məlumatı diqqətinizə çatdıracağıq.

Qeyd edək ki, İlkin Qasımov 2019-cu ildən "Abşeron"a, Zaur Musayev və Dağıstan Hüseynov ötən ildən müvafiq olaraq "Murov"a və "Azərreyl"ə rəhbərlik edirdi. Bunlardan İlkin Qasımov "Olimpik" və "Olimpik-Şüvəlan" adı ilə fəaliyyət göstərmiş futbol klublarında prezident və vitse-prezident çalışmış mərhum Vaqif Qasımovun oğludur. O, atası işlədiyi müddətdə həmin klublarda baş menecer vəzifəsində çalışıb.

Səbuhi Musa