"Neftçi" Rusiya "Zenit"ini rusiyalı legioneri Rezuan Mirzovun dubluyla məğlub etdi. Təcrübəli sol cinah yarımmüdafiəçisi "Neftçi Arena"da 2:1 hesabıyla qalib gəldikləri yoldaşlıq görüşündən sonra jurnalistlərin suallarını cavablandırıb.
– "Zenit"lə qarşılaşmadan hansı emosiyayla ayrıldınız?
– Emosiyalar yalnız pozitivdir. Çünki güclü rəqib üzərində qələbə qazandıq. Yaxşı komandayla yaxşı oynadıq, yaxşı sınaq oldu. "Zenit"i məğlub etmək həmişə xoşdur.
– Bu komandaya Rusiyada "Arsenal"da çıxış edəndə 2 qol vurmuşdunuz. Onu da nəzərə alsaq ki, "Zenit"ə qarşı müxtəlif klubların heyətində dəfələrlə oynamışdınız, əlavə motivasiyanız vardı?
– Elə bir xüsusi motivasiyam yox idi. Lakin "Zenit"ə qarşı oynamaq, qol vurmaq həmişə xoşdur. Üstəlik, qalib gəlirsənsə, bu dəyərli bir şeydir. Buna görə qələbə qazanmağımız yaxşı oldu. İndi növbəti rəsmi oyunumuza hazırlaşacağıq.
– "Zenit"i yaxşı tanıdığınızı nəzərə alsaq, komandadan sizə matçadək rəqib haqda əlavə suallar verilirdi?
– Bu yalnız oyunöncəsi mətbuat konfransında oldu ki, rəqibin hansı güclü-zəif tərəfləri var.
– Yeri gəlmişkən, həmin konfransda qol vuracağınızı söz vermişdin, 2 qol vurdunuz...
– Qol söz vermişdim, sözümü tutdum (gülür).
– Bəlkə hər matçdan əvvəl azarkeşlərə belə qol söz verəsiniz, sonda da bombardir olasınız?
– Sonra deyəcəklər ki, bax, söz vermişdi, əməl etmədi. Axı, hər dəfə qol vurmaq alınmır.
– Maraqlıdır, "Zenit"in futbolçuları matçda sonra sizinlə oyunla, qollarınla bağlı söhbətləşdi?
– Bəli. "Zenit"də qalan, əvvəldən tanıdığım futbolçularla söhbətləşdim. Baş məşqçiylə bir az danışdım. Onlara uğurlar arzuladım. Prinsipcə, kimi tanıyırdım, 2-3 nəfər idilər, hamıyla ünsiyyət qurdum.
– Görürük ki, hər matçdan matça artırırsınız. Bu temp davam edəcək?
– Ümid edirəm ki, hər dəfə artıracağam. Çünki bunadək çox zaman buraxdım. Hər oyundan oyuna özümə gəlirəm. Hesab edirəm ki, növbəti dəfə daha yaxşı olacaq.
– Bu gün həm də komanda olaraq yaxşı oynadınız. Premyer Liqada isə bunu görmürük. Niyə belə olur? Bəlkə məsələ motivasiyadadır?
– Ümid edirəm ki, növbəti matçda bu oyunu göstərəcəyik.