"LANDAU Layns" basketbol klubunun baş məşqçisi Ərhan Tokər "Gəncə"ni 85:62 hesabı ilə məğlub etdikləri oyundan sonra fikirlərini bölüşüb.
Prosport.Az xəbər verir ki, türkiyəli mütəxəssis avrokubok səfərindən sonra sıx qrafikə uyğunlaşmağın çətin olduğunu bildirib:
"Səfərdən qayıtdıqdan sonra cəmi bir fiziki hazırlıq və bir basketbol məşqi edə bildik. Proses çətin və intensiv keçir, Avropadan qayıtdıqdan sonra oyuna çıxmaq asan deyil. Buna baxmayaraq, bütün oyunçular yorğun olmalarına rəğmən əllərindən gələni etdilər. Bir neçə oyundur müdafiədə yaxşı təsir bağışlayırıq. "Naxçıvan"la matçda hücumda o qədər də yaxşı deyildik, bu gün isə həm müdafiədə, həm də hücumda uğurlu çıxış etdik. "Naxçıvan" və "Cenevrə" ilə oyunları müqayisə etsək, müdafiədə irəliləyişin olduğunu görərik. Hələ də zədəli və heyətdə olmayan basketbolçularımız var, amma liqa uzun marafondur. Bu gün çətinlikləri biz yaşayırıq, gələcəkdə digər komandalar da eyni vəziyyətlə üzləşə bilər".
Ə.Tokər avrokubok oyunlarının yerli çempionatdakı çıxışlarına təsirindən də danışıb:
"Çox təsir edir. Əslində, bizi oyunların özü deyil, daha çox səfərlər yorur. Gənc oyunçularımız üçün bu vəziyyət daha da çətindir. Səfər oyunlarına gedərkən mütləq tranzit uçuşlardan istifadə etməli oluruq. Hava limanında gözləmək, başqa təyyarəyə minmək və geri qayıdarkən eyni prosesi yaşamaq çox yorucudur. Təsəvvür edin, Portuqaliyada oyunumuzu Bakı vaxtı ilə saat 23:30-da keçirdik. Oradan Bakıya qayıdarkən saat fərqi də öz təsirini göstərir və yeni rejimə uyğunlaşmaq çətin olur".
