Bu ilin sonunadək olimpiya idman növləri üzrə federasiyalarda seçkilər keçirilməsi nəzərdə tutulur.
Prosport.Az həmin federasiyaların adlarını təqdim edir:
Azərbaycan Basketbol Federasiyası – Elm və təhsil naziri olan Emin Əmrullayev 2021-ci ilin 14 dekabrında prezident seçilib. Bu səbəbdən növbəti ay seçkinin keçiriləcəyi gözlənilir. Qeyri-adi hal baş verməsə, Emin Əmrullayev yenidən federasiya prezidenti seçiləcək.
Azərbaycan Həndbol Federasiyası – Avtomobil Yolları Dövlət Agentliyinin sabiq rəhbəri Saleh Məmmədov 2022-ci ilin 3 fevralında növbəti dəfə prezident seçilib. Hazırda federasiyaya baxmaqdan imtina etdiyindən, ötən mövsümkü çempionatlar yarımçıq qalıb, Mingəçevirin "Kür" klubu istisna olmaqla komandalar, demək olar ki, dağılıb, qurum özü isə fəaliyyət göstərmir.
Azərbaycan Qış İdman Növləri Federasiyası – Dövlət Turizm Agentliyinin sədri Fuad Nağıyev 2022-ci ilin yanvarın 31-də prezident seçilib. Böyük ehtimalla, yenidən prezident seçiləcək.
Azərbaycan Reqbi Federasiyası – "Azəriqaz"ın Hüquq şöbəsinin rəisi Röyal Süleymanov 2024-cü il martın 12-də prezident seçilsə də, ötən il vəzifəsindən ayrılıb. Hazırda bu vəzifəni “Qarabağ” reqbi klubunun təsisçisi, sabiq idman jurnalisti Eldar Kərimov icra edir. Bu ayın sonunda seçki olacağı gözlənilir.
Azərbaycan Taekvondo Federasiyası – Fövqəladə hallar naziri Kəmaləddin Heydərov 2021-ci ilin dekabrın 30-da növbəti dəfə prezident seçilib. Onun yenidən prezident seçiləcəyi gözlənilir.
Qeyd edək ki, artıq bu il fevralda Gimnastika Federasiyasında, martda Su İdmanı Növləri Federasiyasında, apreldə Qolf Federasiyası və Boks Federasiyasında, mayda Tennis Federasiyasında, sentyabrda Stolüstü Tennis Federasiyası və Alpinizm Federasiyasında prezident seçkiləri baş tutub. I vitse-prezident Mehriban Əliyeva (Gimnastika Federasiyası), "Azərişıq"ın rəhbəri Vüqar Əhmədov (Su İdmanı Növləri Federasiyası), "ISR Holding"in baş icraçı direktoru Rauf Xəlilov (Qolf Federasiyası), maliyyə naziri Sahil Babayev (Boks Federasiyası) və Baş nazirin müavini Şahin Mustafayev (Stolüstü Tennis Federasiyası) yenidən prezident seçilib. "Efendiler Group"un rəhbəri Ənvər Ənvərli Tennis Federasiyasında Milli Məclisin sabiq spikeri Oqtay Əsədovu, ekologiya və təbii sərvətlər nazirinin müavini Ağakərim Səmədzadə isə Alpinizm Federasiyasında eks nazir Muxtar Babayevi əvəzləyib.