"Turan" qadın voleybol komandasının Çempionlar Liqasının III təsnifat mərhələsində Bolqarıstanın "Maritsa" klubu ilə oyunlarının məkanında dəyişiklik olub.

Prosport.Az-ın xəbərinə görə, klublar arasında olan razılıq əsasında yerdəyişmə edilib.

Belə ki, ilk oyun Tovuzda baş tutmalı olsa da, razılıq əsasında 1-ci matç Bolqarıstanın Plovdiv şəhərinə salınıb. Buna səbəb "Turan"ın Balkan yarımadasında – Xorvatiyada olması və oradan Bolqarıstana uçmağın daha ucuz başa gəlməsidir.

Beləliklə, Plovdivdəki matç sabah Kolodruma İdman Zalında (Velodrom) baş tutacaq. Matç Bakı vaxtı ilə saat 20:30-da başlayacaq. Matçın 1-ci referisi Vasileyos Vasileyadis (Yunanıstan), 2-ci referisi Mari-Katerin Bulonje (Belçika) olacaq.

Tovuz Olimpiya İdman Kompleksində baş tutacaq cavab qarşılaşması isə 10 noyabrda keçiriləcək. Saat 18:00-da başlayacaq matçda Deyan Roqiç (Serbiya) 1-ci referi, Nurpər Özbar (Türkiyə) isə 2-ci referi qismində fəaliyyət göstərəcək.

2 oyunun yekununda qalib tərəf qrup mərhələsinə vəsiqə qazanacaq.

Qeyd edək ki, "Turan" II təsnifat mərhələsində Xorvatiya çempionu "Mladost"u 3:0 və 3:2 məğlub edib. "Maritsa" isə Monteneqronun "Xertseq Novi" komandasını 3:0 və 3:2 yenib.