Beynəlxalq Cüdo Federasiyası (IJF) Əbu-Dabidə (BƏƏ) keçirilən “Böyük Dəbilqə” turnirindən sonra dünya reytinq cədvəlini yeniləyib.

Prosport.Az xəbər verir ki, yarışın qızıl medalını qazanan Balabəy Ağayev (60 kq) 5473 xalla yenidən dünya reytinqinin zirvəsinə yüksəlib. Bu çəkidə hazırkı dünya çempionu Əhməd Yusifov isə 5355 xalla 2-ci pilləyə geriləyib.

Zelim Kotsoyev (81 kq) 4536 xalla liderliyini qoruyub. Uşanqi Kokauri (+100 kq) isə 5040 xalla 2-ci yerdə qərarlaşıb.

Digər azərbaycanlı cüdoçuların reytinq mövqeləri belədir:

- Murad Fətiyev (90 kq) – 3836 xalla 3-cü yer;
- Rəşad Məmmədəliyev (73 kq) – 4528 xalla 4-cü yer;
- Kənan Nəsibov (+100 kq) – 3920 xalla 4-cü yer.

Əbu-Dabi turnirinin qalibi Könul Əliyeva (48 kq) reytinqdə 7 pillə irəliləyərək 2541 xalla 16-cı sıraya yüksəlib.

Yarışın bürünc medalçısı, Olimpiya çempionu Hidayət Heydərov (73 kq) da 7 pillə irəliləyərək 2083 xalla 19-cu yerə qalxıb. Rəşad Yelkiev (66 kq) isə 14 pilləlik yüksəlişlə 1825 xalla 20-ci sırada qərarlaşıb.