"Neftçi”nin baş məşqçisi Konstantinos Vasiliadisin "Ordu" ilə oyun haqda fikirlərini bölüşüb.

Prosport.Az xəbər verir ki, mütəxəssis 83:79 hesablı qələbəni şərh edib.

"Bəli, düşünürəm ki, bu oyun bizim üçün bir fürsət idi. Son 2 oyunda öz səviyyəmizdə çıxış edə bilmədik. Hamımız bilirik ki, hələ istədiyimiz səviyyədə deyilik və həmin səviyyəyə çatmaq üçün bəlkə də 1 ay, yaxud bir qədər artıq vaxt lazımdır. Amma hər gün məşqlərdə necə çalışdığımızı nəzərə alsaq, son 2 oyunda göstərdiyimiz performans bizi qane etmirdi. Buna görə də bu qarşılaşma bizim üçün yenidən başlamaq baxımından çox yaxşı fürsət idi".

Onun sözlərinə görə, 2 əsas oyunçu müəyyən problemlərə görə meydana çıxa bilmirdi: "Onları digər oyunçular əvəz etməli, komanda üçün mübarizə aparmalı və öz töhfələrini verməli idilər. Bütün oyunçuların yaxşı çıxış etməsindən çox məmnunam. Xüsusilə, ehtiyat oyunçular skamyasından meydana daxil olan Cəbrayıl, Derin və Ulaşın çıxışını qeyd etmək istəyirəm. Onlar oyuna start heyətində başlamasalar da, komandaya böyük kömək etdilər və qələbəmizdə mühüm rol oynadılar".

Baş məşqçi sözlərinə belə davam edib: "Komanda olaraq hər kəsə göstərdik ki, yaxşı və möhkəm kollektivə sahibik. Heyətimizdə əcnəbi oyunçularla eyni səviyyədə çıxış edə bilən çox yaxşı yerli basketbolçular var. Komandamızda yaxşı ruh formalaşıb və biz hər oyunda mübarizə aparmağa hazırıq.

Qələbəyə görə məmnunam, amma qarşıda bizi hələ çox iş gözləyir. Əvvəl də dediyim kimi, bu, uzun bir marafondur və biz bütün mövsüm ərzində bu mübarizəyə hazır olmalıyıq".