"İlk növbədə "Ritas"ı qələbə münasibətilə təbrik edirəm. Onlar qələbəyə layiq idilər".

Prosport.Az xəbər verir ki, bu sözləri "Sabah" basketbol klubunun baş məşqçisi Lazar Spasiç FIBA Çempionlar Liqasının müntəzəm mövsümünün ilk turunda Litvada "Ritas"a qarşı keçirilən oyundan sonra deyib.

Serbiyalı mütəxəssis 73:82 hesablı məğlubiyyəti şərh edib: "Düşünürəm ki, oyunun böyük hissəsindən razı qala bilərəm. Bu gün əsas fərq ribaundlarda oldu. Onlara bizdən 10 ribaund çox götürməyə imkan verdik. Ribaundlara nəzarət etdikdə oyunun tempinə də nəzarət edirik. Hücum ribaundlarını rəqibə verdikdə isə istədiyimiz oyun ritmini itirdik.

36-37 dəqiqə ərzində komandanın birlikdə qalmasından çox razıyam. Həmçinin "Ritas" 29 sərbəst atış yerinə yetirdi, biz isə cəmi 8. Düşünürəm ki, burada təmasların səviyyəsi və foulların sayı da rol oynadı. Bu şikayət deyil, sadəcə faktlardır. Bəlkə də oyunun nəticəsinə təsir edən ən aydın statistik göstəricilərdən biridir. Onlar sərbəst atışlardan 18 xal qazandılar, biz isə cəmi 6 xal.

Düşünürəm ki, hücumda da kifayət qədər aqressiv oynadıq, amma bunu xala çevirə bilmədik. Həmçinin oyunun elə bir anı oldu ki, fasiləyə daha böyük üstünlüklə yollana bilərdik. Bir neçə açıq üçlükdən istifadə edə bilmədik və hesabda geri düşməyə başladıq".

O bildirib ki, bu məğlubiyyət "Sabah" üçün son deyil, sadəcə bir dərsdir: "Ən vacib məqam odur ki, biz bu gün ÇL-də rəqabət aparmağa və bu liqanın ən güclü komandalarına qarşı oynamağa hazır olduğumuzu göstərdik. Təbii ki, Bakıda keçiriləcək cavab oyunu üçün də çox motivasiyalı olacağıq.

Amma bundan əvvəl geri qayıtmalı və  "Trabzonspor"a qarşı növbəti oyuna hazırlaşmalıyıq.

Bu gün göstərdiyimiz bir çox məqam mənim çox xoşuma gəldi. Təəssüf ki, oyunu qazanmaq üçün yol tapa bilmədik. Bura qələbə və 2 xal üçün gəlmişdik, amma dediyim kimi, təəssüf ki, bunu edə bilmədik.

Digər tərəfdən, çox güclü komandaya qarşı oynadıq. Mənim gördüyüm qədər, onlar oyunda 17 dəqiqə 30 saniyə öndə oldular, biz isə 17 dəqiqə 6 saniyə öndə idik. Bu baxımdan, kifayət qədər gərgin və bərabər oyun oldu. Sonda 9 xallıq fərq bəlkə də olduğundan böyük görünür.

Amma dediyim kimi, bu bizim üçün böyük dərsdir. Ümid edirəm ki, növbəti oyuna hazır olub daha yaxşı oynayacağıq".