"LANDAU Layns" klubunun baş məşqçisi Ərhan Tokər "Sabah"la çempionatın ilk oyunundan sonra fikirlərini bölüşüb.

Prosport.Az xəbər verir ki, türkiyəli mütəxəssis 74:84 hesablı məğlubiyyəti şərh edib:

"Sabah"ı təbrik edirəm. İlk olaraq onu deyim ki, yerli oyunçuların performansı oyun ərzində ümumi gedişata, hansı oyunçunun öz mövqeyində, yoxsa fərqli mövqedə oynamasına təsir edir. Bu görüşdə Ercan Donat bir qədər kömək etməyə çalışdı, ilk dövrədə Nicat Məmmədli də komandaya kömək etdi. İsmayıl Abdullayev isə gözlədiyimizdən  zəif təsir bağışladı. Bütün bunları nəzərə alsaq, müdafiədə yaxşı çıxış edə bilmədik. Rəqib bir qədər sərt oynadı. Hakimlər də gözəl və keyfiyyətli oyun olması üçün sərtliyə icazə verdi. Biz onlar qədər sərt oynaya bilmədik. Bir qədər bu məqamda problem yaşadıq. Mübarizədən razı qaldım. Hər zaman olduğu kimi, biz bu oyundan dərs çıxaracağıq və harada səhv etdiyimizi təhlil edəcəyik. Bir də təbii ki, Arnas Sakenisin zədələnməsi də gedişata təsir etdi. Edvart Polayt isə onsuz da zədə səbəbindən tam hazır deyildi. Arnasın zədələnməsi fonunda parket üzərində çox qalmağa məcbur oldu. Qarşıda bizi "Cenevre Layns"la oyun gözləyir. FIBA Avropa Kubokunda bu mövsüm qruplarda ilk oyunumuzdur. Artıq bizim üçün önəmli olan o matça hazırlıqdır".