Bu gün GİN-in Voleybol Mərkəzində 2026-2027-ci illər mövsümündə voleybol üzrə Super Liqada mübarizə aparacaq qadın və kişi komandalarının nümayəndələri ilə görüş keçirilib.

Prosport.Az xəbər verir ki, görüşdə ötən mövsümlər Yüksək Liqa adı ilə keçirilmiş yarışın yeni mövsümdən etibarən Super Liqa adlanacağı bildirilib, həmçinin liqanın 2026-2027-ci illər mövsümü üzrə əsasnaməsi klub nümayəndələrinə təqdim olunub.

Ötən mövsüm olduğu kimi, bu dəfə də Super Liqada 9 qadın (“Turan”, “DH Volley”, “Gəncə”, “Milli Aviasiya Akademiyası”, UNEC, “Azərmaş Abşeron”, “Murov Az Terminal”, “Azərreyl" və “Naxçıvan”), 6 kişi komandası (“Xilasedici”, “ORDU”, “Neftçi”, “Murov Az Terminal”, “AZERRAIL” və “Gənclər”) mübarizə aparacaq. Yeni mövsümdə qadınların yarışında 2 yenilik olacaq. Ötən mövsüm “Abşeron” adı ilə çıxış etmiş komanda bu dəfə “Azərmaş Abşeron” adı ilə mübarizə aparacaq. “Naxçıvan” klubu isə tarixində ilk dəfə Super Liqada iştirak edəcək. Bu komanda "Gənclər"i əvəzləyəcək.

Super Liqanın 2026-cı ilin oktyabr ayında start götürməsi və 2027-ci ilin aprelində başa çatması nəzərdə tutulur. Yarışın liqa və pley-off mərhələlərindən ibarət olacağı diqqətə çatdırılıb. Qadınların yarışında liqa mərhələsi dairəvi sistem üzrə ev-səfər prinsipi ilə bir dövrədə keçiriləcək. Nəticələrə əsasən, 8 komanda pley-offa yüksələcək. Kişilərin yarışında isə oyunlar dairəvi sistem üzrə ev-səfər prinsipi ilə iki dövrədə təşkil olunacaq. İki dövrənin yekununda 1-4 pillələrdə qərarlaşacaq komandalar pley-offda iştirak hüququ qazanacaqlar.