Azərbaycan Respublikası Milli Paralimpiya Komitəsinin təşkilatçılığı ilə paraatletika üzrə Açıq Qapı Günü keçirilib.

Prosport.Az xəbər verir ki, Bakı Atletika Mərkəzində təşkil olunan tədbirin əsas məqsədi paraatletikaya marağı olan yeni istedadların aşkarlanması, əlilliyi olan şəxslərin idmana cəlb olunmasının təşviqi və milli komanda üçün perspektivli idmançılardan ibarət ehtiyat bazasının formalaşdırılması olub.

Tədbirdə 8–17 yaş aralığında iştirakçılar qaçış, uzunluğa tullanma və nüvə itələmə növləri üzrə bacarıqlarını sınayıb, mütəxəssislərin nəzarəti altında ilkin qiymətləndirmədən keçiblər.

İştirakçılara paraatletika haqqında ətraflı məlumat verilib, onların fiziki göstəriciləri və idman potensialı qiymətləndirilib. Göstəriciləri uyğun olan iştirakçıların gələcəkdə paraatletika üzrə məşqlərə cəlb olunması və inkişaflarının izlənilməsi nəzərdə tutulub.

Milli Paralimpiya Komitəsi bu cür təşəbbüslərin davamlı keçirilməsi ilə paraatletikanın daha geniş kütlələr arasında təbliğini, yeni istedadların aşkarlanmasını və gələcəkdə milli komandaya cəlb oluna biləcək perspektivli idmançıların müəyyənləşdirilməsini hədəfləyir.