"Turan" Voleybol Klubunun CEV Çempionlar Liqasının II mərhələsində "Mladost"la (Xorvatiya) cavab oyununun başlanma saatı müəyyənləşib.

Prosport.Az-ın xəbərinə görə, oktyabrın 29-da Xorvatiyanın paytaxtı Zaqrebdə keçiriləcək matç Bakı vaxtı ilə saat 22:00-da başlayacaq. 

Matç Zaqrebdəki 500 tamaşaçı tutumu olan Boyan Straniç adına voleybol zalında baş tutacaq.

Oyunları idarə edəcək hakimlər də müəyyənləşib. Oktyabrın 20-də Tovuz Olimpiya İdman Kompleksinin voleybol zalında keçiriləcək və saat 19:00-da başlayacaq görüşün 1-ci hakimi serbiyalı Aleksandar Petroviç, 2-ci referisi türkiyəli Ərdal Akıncı olacaq.

Xorvatiyadakı matçda isə əsas referi funksiyasını polyak əsilli Dominik Beqaylo (İngiltərə) icra edəcək. 2-ci hakim isə qadın olacaq. Bu, italiyalı Dominqa Lotdur.

Qeyd edək ki, "Turan" III mərhələyə vəsiqə qazansa, "Xerçeq Novi" (Monteneqro) – "Maritsa" (Plovdiv, Bolqarıstan) cütünün qalibi ilə qarşılaşacaq.