Növbəti mövsüm qadın həndbolu üzrə Azərbaycan çempionatında yeni komanda çıxış edəcək.

Prosport.Az-ın əldə etdiyi məlumata görə, bu, "Kür" komandasıdır.

"Kür" çempionatda Azərbaycanın 4-cü böyük sənaye şəhəri olan Mingəçeviri təmsil edəcək. Komandaya artıq əcnəbi baş məşqçi də cəlb olunub. Rusiyalı əməkdar məşqçi, Rusiya millisinin sabiq böyük məşqçisi Viktor Ryabıx "Kür"ü çalışdıracaq. 63 yaşlı məşqçiyə ötən mövsüm "Azəryol"da çalışmış gənc məşqçi Fuad Yangildin köməklik edəcək. 

Bundan başqa, komanda 15 həndbolçu ilə müqavilə imzalayıb. Onların arasında xorvatiyalı Anamaria Quqiç, nigeriyalı Çaynmerem Qreys Ahamefula, monteneqrolu Militsa Stamatoviç və daha əvvəl Mingəçevirin "Nur" komandasında çıxış etmiş rusiyalı Alla Çernışkova var.

Qeyd edək ki, əvəllər Mingəçevirdə qadın həndbolu üzrə "Nur" komandası fəaliyyət göstərib. Bu komanda 2016/2017 mövsümündə Azərbaycan çempionu olsa da, 2018-ci ildə fəaliyyətini dayandırıb. Səbəb isə federasiya ilə klub arasındakı anlaşılmazlıq olub. Belə ki, 2018/2019 mövsümündə yerli klublarda legionerlərin çıxışı ilə bağlı limit tətbiq edilib. "Nur"un tərkibi isə bütünlüklə legionerlərdən ibarət olduğundan, federasiya tərəfindən çempionatdan kənarlaşdırılıb.