UEFA Konfrans Liqasının II təsnifat mərhələsinin cavab matçında "Zirə" doğma meydanda Estoniya təmsilçisi "Payde" ilə 1:1 hesablı heç-heçə edərək, avrokuboklarla vidalaşıb.

Matçdan sonra "Zirə"nin futbolçusu Ayxan Hüseynov Prosport.Az-a müsahibə verib.

— Oyuna yaxşı başladıq, ilk dəqiqələrdə hesabı açdıq. Ondan sonra da yaxşı vəziyyətlərimiz, qol epizodlarımız var idi. Həmin epizodlara girə bildik, amma onları qola çevirə bilmədik. Bilmirik, bunun səbəbi nə idi. 2-ci hissədə bir anlıq rahatlaşdıq. Rəqib də bunu bizə bağışlamadı. Daha sonra yenə çoxlu qol epizodları yaratdıq. Bilmirəm, bəxtsizlik idi, yoxsa başqa səbəb var idi. Məncə, qələbə qazanmalı idik. Amma futbolda belədir: öz qol imkanlarını dəyərləndirə bilmirsənsə, qələbə də qazana bilməyəcəksən.

— Kifayət qədər epizodlar var idi. Hətta dirəkdən qayıdan toplar da oldu. Son nöqtəni qoymaq üçün nə çatmırdı? Komandada sanki tələskənlik var idi?

— Ola bilər. Biz özümüz də səbəbini başa düşə bilmirik. O qədər standart vəziyyətlərimiz, zərbələrimiz var idi. Birəbir epizodlara da çıxdıq, amma vura bilmədik. Bilmirəm, bəlkə də rəqib qapıçı çox yaxşı çıxış etdi. Amma məncə, həmin epizodları qolla tamamlamalı idik.

— Rəqibin cərimə meydançasında şübhəli penalti epizodu da var idi...

— Hansı epizod?

— Dirəkdən qayıdan topdan əvvəlki epizod...

— Hə, orada görünürdü ki, top rəqib oyunçunun əlinə dəymişdi. Amma VAR sistemi yoxdur, bəlkə də hakim bunu görmədi. Ona görə də bu barədə nəsə demək çətindir.

— Öz çıxışınız barədə nə deyə bilərsiniz? Yeni komandanda özünüzü necə hiss edirsiniz?

— "Zirə"nin futbolçusu olmaq mənim üçün çox xoşdur. Rəşad müəllimlə çox söhbət edirdik. Deyirdi ki, hazırlaş, hazır olan anda şansın olacaq. Mən də çalışırdım ki, bu gün əlimdən gələni edim. Yaxşı alınan məqamlar da oldu, alınmayanlar da. Amma yenə də öz üzərimdə işləməliyəm. İnkişaf etmək, daha da artırmaq istəyirəmsə, öz üzərimdə çox çalışmalıyam.

— "Turan Tovuz"la avrokuboklara gedə bilmədiniz. Necə oldu ki, sonra "Zirə"yə keçdiniz? "Turan Tovuz"dan ayrılarkən bu barədə komanda yoldaşlarınızla söhbətiniz olmuşdu?

— Yox, yox. "Turan Tovuz" barədə danışmaq istəmirəm, üzrlü sayın. Bu komanda həmişə mənim ürəyimdə olacaq, amma bu barədə danışmaq istəmirəm. Üzrlü sayın.

Bahar Rüstəm