Qadın voleybolu üzrə Azərbaycan çempionatında 2 yeni klub debüt edəcək.

Prosport.Az-ın xəbərinə görə, bunlar "Buta" və "Gəncə" klublarıdır.

"Buta"nın prezidenti Vüqar Quliyevdir. 46 yaşlı, "karateçi Vüqar" kimi tanınan bu şəxs 1998-ci ildə Azərbaycan Bədən Tərbiyəsi və İdman Akademiyasının təkmübarizəlik fakültəsini bitirib. O, voleybola yad sima deyil. V. Quliyev əvvəllər voleybolla məşğul olub, bir sıra çempionatlarda iştirak edib. 1993-cü ildən isə karatenin kyokuşinkay növü ilə məşğul olmağa başlayıb. 1999-cu ildə Azərbaycan çempionu adını qazanıb, I dan qara kəmər ustası olub. 2005-ci ildə karatenin tamaşivari növü üzrə keçirilən çempionatda qızıl medal qazanıb. Rusiya Kyokuşinkay Fedarasiyasının Perm şəhəri üzrə nümayəndəsidir və burada fəaliyyət göstərən karate idman klubuna rəhbərlik edir. Kyokuşin Karate Federasiyasının təşkil etdiyi yarışlarda hakim kimi də fəaliyyət göstərib. Onun atası Əşrəf Quliyev vaxtı ilə Füzuli rayonunda voleybol komandasının rəhbəri olub.

"Gəncə"nin prezidenti isə Elvar Osmanovdur. O Osmanov ki, daha əvvəl Reqbi Federasiyasında vitse-prezident olub. Bu klub artıq əməli fəaliyyətə başlayıb. Komandaya belaruslu baş məşqçi Sergey Çesnovitski də cəlb olunub.

Daha bir xəbər odur ki, kişilərdə ötən mövsüm Azərbaycan çempionu olmuş "Murov"un adı dəyişdirilir. "Murov" da artıq federasiya prezidenti Şahin Bağırovun rəhbəri olduğu Dövlət Gömrük Komitəsi tərəfindən maliyyələşəcək. Belə ki, klubun prezidenti Cavid Kərimov olacaq. O, “Azərterminalkompleks” təsərrüfat hesablı xarici iqtisadi birliyində işləyir. Bu səbəbdən də klubun adı yeni mövsümdən "Murov-Azterminal" olacaq. Sadəcə, məsələnin rəsmiləşməsi qalıb.

Qeyd edək ki, daha əvvəl "Azərreyl"ə Orxan Kərimovun, "Abşeron"a isə İlqar Nuriyevin rəhbərlik edəcəyini yazmışdıq.

Səbuhi Musa