Voleybol üzrə qız yeniyetmə və gənclərdən ibarət millimizin yeni baş məşqçisinin kimliyi bilinib.

Prosport.Az-ın xəbərinə görə, bu, İran azərbaycanlısı olan Həmid Ənvəridir.

Ənvəri daha əvvəl Şahin Çatmanın kollektivində çalışıb. Daha sonra onunla arasında olan anlaşmazlığa kollektivdən ayrılmışdı.

Həmid Ənvəri müvəqqəti olaraq komandaya baş məşqçi təyin olunub. Onun daha əvvəl bu millidə köməkçi kimi çalışması təyinatın baş tutmasında əsas rol oynayıb. Ənvəri bu gün-sabah artıq federasiya ilə müqavilə bağlamaq üçün ölkəmizə gəlməlidir.

Qeyd edək ki, daha əvvəl türkiyəli Şahin Çatmanın istefaya getdiyini xəbər vermişdik. Onun köməkçiləri Zihni Türkay Taylan və statistik Birol Serimlə də yollar ayrılıb.

Onu da bildirək ki, oğlan yeniyetmə və gənclərdən ibarət millimizin baş məşqçisi İran azərbaycanlısıdır. Bu, Cahangir Seyid Abbasidir.