"Qarabağ"ın UEFA Çempionlar Liqasının II təsnifat mərhələsinin "Rakuf"la (Polşa) cavab oyununu matçın keçiriləcəyi Bakı Olimpiya Stadionunda (BOS) edə bilməməsinin səbəbi bəlli olub.

Prosport.Az-ın əldə etdiyi məlumata görə, buna səbəb BOS-un stadionunun həddindən artıq yüklənməsi olub.

Çünki daha əvvəl xəbər verdiyimiz kimi, "Neftçi" artıq məşqlərini baş sponsoru SOCAR-ın balansında olan BOS-da keçirir. "Neftçi"nin məşqləri isə birbaşa əsas meydançada baş tutur. Ümumiyyətlə, əldə etdiyimiz digər məlumata görə, "Neftçi" UEFA Avropa Konfrans Liqasının III təsnifat mərhələsinə çıxarsa, "Beşiktaş"la (Türkiyə) ev oyununu Tofiq Bəhramov adına Respublika stadionunda yox, BOS-da keçirə bilər.

Qazonun yüklənməsi (çünki "Rakuf" da orda məşq keçməliydi – red.) səbəbindən, "Qarabağ" dünən məşq meydançası kimi çempionatda ev oyunlarını keçirdiyi "Azərsun Arena"dan yararlanmalı olub.