Dünən Gənclər və İdman Nazirliyinin növbəti Kollegiya iclası keçirilib.

Prosport.Az xəbər verir ki, nazir Fərid Qayıbovun sədrliyi ilə baş tutan iclasda gündəlikdə duran məsələlər müzakirə olunub və müvafiq qərarlar qəbul edilib.

İclasda 2026-cı il üçün Gənclər və İdman Nazirliyinin perspektiv iş planı, idman növləri üzrə yığma komandaların, məşqçi və idmançı heyətlərinin siyahısı, eləcə də 2026-cı il üçün təqvim planı təsdiqlənib. Həmçinin “İdman Paytaxtı – Qəbələ” və “Gənclər Paytaxtı – Sumqayıt” üzrə illik hesabatlar dinlənilərək qəbul edilib.

İclasda həmçinin karate, triatlon və voleybol federasiyalarının fəaliyyət istiqamətlərinə yeni idman növləri və fənlərin əlavə edilməsi məsələsinə baxılıb. “Akvabayk” Azərbaycan Triatlon Federasiyasının, “Qar voleybolu” Azərbaycan Voleybol Federasiyasının, “Karate”, “Ənənəvi karate”, “Fudokan karate”, “Fullkontakt şinkyokuşin karate” və “Kyokuşin (Kay) senşi karate” Azərbaycan Karate Federasiyasının fəaliyyət istiqamətlərinə əlavə edilərək ölkə ərazisində yayılan idman fənni kimi tanınıb. 

Sonda nazir Fərid Qayıbov Mərkəzi Aran Regional Gənclər və İdman İdarəsinin rəisi Azad Gözəlovu 2025-ci il ərzində səmərəli fəaliyyətinə görə, Mil-Muğan Regional Gənclər və İdman İdarəsinin rəisi Elçin Qiyasovu isə 50 illik yubileyi münasibətilə təltif edib.